Navoiy viloyatida hokimlik tomonidan issiqxona qurish uchun ajratilgan yer maydonini pullamoqchi bo‘lgan shaxslar ushlandi. Bu haqda Ichki ishlar vazirligi xabar qildi.
Qayd etilishicha, 2 gektar yer maydoni gumonlanuvchilardan birining o‘g‘liga hokim tomonidan imtiyoz sifatida issiqxona qurib, daromad ko‘rish maqsadida berilgan. Mazkur yerni sotish vakolati bo‘lmasa ham, uch nafar shaxs til biriktirib, boshqa bir fuqaroga maydonni 200 ming dollarga sotmoqchi bo‘lgan.
Xaridor quruvchi bo‘lgani bois unga namunaviy turar-joy qurish uchun yer kerak bo‘lgan. Gumonlanuvchilar bu masalani ham hal qilib berishini aytib, xizmati evaziga yana 20 ming dollar talab qilgan.
Ular kimyoviy ishlov berilgan pullarni olayotganda ushlangan.
Tergov hujjatlariga ko‘ra, gumonlanuvchilar savdo kompleksi va xizmat ko‘rsatish obyektida rahbar bo‘lgan.
Holat yuzasidan ularga nisbatan Jinoyat kodeksining tegishli moddalari bilan jinoyat ishi qo‘zg‘atilgan. Hozirda tergov harakatlari olib borilmoqda.
Izoh (0)