Farg‘ona vodiysida elektr bilan bog‘liq muammolar kuzatilyapti. Vazirlik buni “havo keskin sovib ketgani” bilan izohladi

Vodiy viloyatlarining ayrim hududlarida elektr ta’minotida qisqa muddatli uzilishlar kuzatilmoqda, deb xabar bermoqda Energetika vazirligi matbuot xizmati.

Qayd etilishicha, shu kunlarda havo haroratining keskin sovib ketishi natijasida magistral gaz quvurlarida tabiiy gaz bosimining pasayishi kuzatilmoqda. Buning natijasida To‘raqo‘rg‘on issiqlik elektr stansiyasiga belgilangan hajmlardan kam miqdorda tabiiy gaz yetib bormoqda. Bu esa, o‘z navbatida, mazkur stansiya tomonidan elektr energiya ishlab chiqarish hajmining pasayishiga olib kelmoqda.

Energetika tizimining barqaror ishlashini ta’minlash va tizimda yuzaga kelishi mumkin bo‘lgan katta avariyalar hamda uzilishlarning oldini olish maqsadida vodiy viloyatlarining ayrim hududlarida elektr ta’minotida qisqa muddatli cheklovlar kiritishga majbur bo‘linmoqda.

Hozirgi paytda mutaxassislar tomonidan yuzaga kelgan ushbu muammoni bartaraf etish bo‘yicha tegishli chora-tadbirlar olib borilmoqda.

Keltirilgan noqulayliklar uchun iste’molchilardan uzr so‘raymiz, — deyiladi xabarda.