O‘zbekistonda davlat xizmatchilarining sovg‘a olishi bo‘yicha yangi tartib o‘rnatilishi haqida xabar berilgan edi. Adliya vazirligi ushbu o‘zgarish yuzasidan tushuntirish berdi.
Qayd etilishicha, mamlakatda davlat fuqarolik xizmati tizimini tartibga solishga qaratilgan maxsus qonun qabul qilinishi natijasida O‘zbekistonda ijro hokimiyati funksiyalarini amalga oshiruvchi davlat organlari va tashkilotlaridagi 118 mingdan ortiq davlat fuqarolik xizmatchilari faoliyati bilan bog‘liq barcha munosabatlarni yagona qoidalar asosida tartibga solish imkoni yaratilmoqda.
Shuningdek, bugungi kunda davlat fuqarolik xizmatida korrupsion xavfni minimallashtirish maqsadida ishlab chiqilgan Davlat fuqarolik xizmatchisi tomonidan xizmat safarlari, xalqaro va boshqa rasmiy tadbirlar munosabati bilan olinishi mumkin bo‘lgan sovg‘a qiymati, shuningdek uni tasarruf etish tartibi to‘g‘risidagi nizom loyihasi yuzasidan ijtimoiy tarmoqlarda, elektron ommaviy axborot vositalarida turli noto‘g‘ri talqinlar paydo bo‘lmoqda.
Quyida nizomdan ko‘zlangan asosiy maqsad va bu yo‘nalishdagi xorij tajribasidan ayrimlariga to‘xtalib o‘tiladi.
Birinchidan, bugungi kunda nafaqat O‘zbekistonda, balki butun dunyoda davlat xizmatchilari tomonidan turli marosimlar, tadbirlar, uchrashuvlar davomida sovg‘alar berish va qabul qilish an’anasi mavjud. Bu an’ana mehmondo‘stlik, ish yuritishda o‘zaro hurmat kabi qadriyatlar ustiga qurilgan. Nizom loyihasidan asosiy ko‘zlangan maqsad esa davlat fuqarolik xizmatchilarining mana shu qadriyatlarini huquqiy tartibga solish, uning korrupsion xavfga aylanmasdan turib aniq chegaralarini belgilashdan iborat.
Umuman olganda, nizom loyihasi orqali davlat fuqarolik xizmatchisi tomonidan olinishi mumkin bo‘lgan sovg‘a qiymati, shuningdek uni tasarruf etish talablari hamda aniq mezonlari belgilanadi.
Ikkinchidan, nizom loyihasida sovg‘a qabul qilishning talablari, aniq miqdori belgilangan. Unga ko‘ra, davlat fuqarolik xizmatchilari tomonidan sovg‘alar faqat xizmat safarlari, xalqaro va boshqa rasmiy tadbirlar munosabati bilan olinishi mumkin. Umumiy qoidaga ko‘ra sovg‘aning qiymati BHMning 5 baravaridan ko‘p bo‘lishi mumkin emas.
Ushbu normalardan anglashiladiki, davlat fuqarolik xizmatchilari fuqarolar yoki bevosita boshqa manfaatdor shaxslardan muayyan ishni hal qilib berish yoki kelgusidagi manfaatlar uchun sovg‘a olmaydi, bu qonunlar bilan taqiqlangan.
Nizom loyihasi davlat fuqarolik xizmatchilariga fuqarolardan sovg‘a olishiga ruxsat bermaydi.
Uchinchidan, davlat fuqarolik xizmatchilarining sovg‘a olish masalasi bir qator rivojlangan davlatlar tomonidan huquqiy tartibga solingan, xususan, davlat fuqarolik xizmatchisi qabul qilishi mumkin bo‘lgan bir martalik sovg‘aning qiymati AQSHda 20 dollar, yillik miqdori senatorlar uchun 350, kongressmenlar uchun 250 AQSH dollaridan oshmasligi lozim, Singapurda 50 Singapur dollari, Buyuk Britaniyada 140 funt sterling (160 AQSH dollari), Fransiyada 35 yevro (34 AQSH dollari), Rossiyada 3 ming rubl (49 AQSH dollari) Gruziyada 150 lari (54 AQSH dollari) etib belgilangan.
Mazkur nizom loyihasi davlat fuqarolik xizmatida korrupsiyaning oldini olish sohasida huquqiy bazani takomillashtirishga xizmat qiladi. OAV, jurnalistlar va blogerlarni qonunchilik hujjatlari, ularning loyihalarini keng jamoatchilikka yetkazishda noto‘g‘ri talqinga yo‘l qo‘ymaslikka chaqiramiz, — deyiladi xabarda.
Izoh (0)