Toshkent metropoliteni “Chilonzor” yo‘nalishi Sergeli yo‘lining 5-bekatida 7-noyabr kuni nosozlik yuzaga kelishi oqibatida poyezdlar bir tomonlama harakatni amalga oshirdi. Bu haqda metropoliten axborot xizmati xabar berdi.
Qayd etilishicha, soat 19:10 da poyezd harakat yo‘lida texnik nosozlik holati kuzatilgan, buning oqibatida bekatda bo‘lgan 17-sonli harakat tarkibi harakatlana olmagan hamda ushbu yo‘lda yo‘lovchilar va harakat xavfsizligini ta’minlash maqsadida harakat vaqtinchalik to‘xtatilgan.
Ushbu vaqt oralig‘ida “Buyuk Ipak yo‘li” hamda “Olmazor” bekatlari oralig‘ida poyezdlar jadval asosida harakatlangan.
“Olmazor” hamda Sergeli yo‘li 5-bekat oralig‘ida ushbu nosozlik holati tuzatilgunga qadar bir tomonlama harakat amalga oshirilgan. Soat 19:37 da kuzatilgan nosozlik mutaxassislar tomonidan bartaraf etilgan va poyezdlar harakatlana boshlagan. Hozirda barcha poyezdlar belgilangan jadval asosida harakatlanmoqda.
Izoh (0)