Farg‘onadagi 15 yoshli o‘smir o‘limida 8 nafar voyaga yetmagan bolalar gumonlanayotgani ma’lum bo‘ldi

Farg‘ona viloyatining Qo‘qon shahridagi IIB binosidan 15 yoshli o‘smir bolaning murdasi chiqqani xabar berilgandi. Ichki ishlar vazirligi axborot xizmati rahbari Shohrux G‘iyosovning “Daryo”ga ma’lumot berishicha, o‘smir yigit o‘limida gumonlanayotganlar olti emas, sakkiz nafar bolani tashkil qiladi.

2022-yil 16-oktabr kuni soat 21:30 da Buvayda tumani IIB JXX HPB VEMB inspektor psixologi leytenant R.Abdullayev tomonidan voyaga yetmagan R.A. Vazirlar Mahkamasi qarori bilan tasdiqlangan “Voyaga yetmaganlarga ijtimoiy-huquqiy yordam ko‘rsatish markazlari to‘g‘risida”gi nizomga asosan nazoratsiz qolganligi aniqlangan voyaga yetmaganlarning shaxsini aniqlab, ota-onasi yoki ularning o‘rnini bosuvchi shaxslarga topshirish maqsadida tegishli hujjatlar rasmiylashtirilib, Farg‘ona viloyati IIB JXX HPB tasarrufidagi voyaga yetmaganlarga ijtimoiy huquqiy yordam ko‘rsatish markaziga olib kelingan. Markaz xodimlari tarbiyachi katta serjant Sarvar Egamnazarov va tarbiyachi katta serjant Iqboljon Yakubov tomonidan qabul qilinganida uning o‘ng ko‘zida qizarish izlari borligi aniqlanib, tegishli hujjatlar rasmiylashtirilib qabul qilingan. Va markazning alohida xonasiga joylashtirilgan, — deyiladi vazirlik axborotida.

Aniqlanishicha, 17-oktabr kuni soat 09:00 da voyaga yetmagan R.A. markaz hamshirasi O‘lmasxon Tursunova tomonidan tibbiy ko‘rikdan o‘tkazilib, sog‘lig‘idan shikoyat qilmaganligi uchun markazda tarbiyalanayotgan o‘g‘il bolalar yotoqxonasiga joylashtirilgan.

Shunda xonada bo‘lgan tarbiyalanuvchi voyaga yetmagan K.S. 15 yoshli o‘smir R.A.dan qayerdan ekanligini, nima sababdan kelganligini so‘rab ustidan kulib masxaralagan. Uning bosh qismiga qo‘li bilan urgan. Shundan so‘ng xonadagi sheriklari, 7 nafar voyaga yetmagan tarbiyalanuvchilar — A.E, M.A, A.T, S.M, Q.N, D.D, va Y,D.lar ham bolaning duch kelgan joyiga qo‘li bilan urgan. S.K. bu bilan kifoyalanmay, R.A.ning bo‘ynidan bo‘g‘ib, uch marotaba hushidan ketkazgan. Oxirgi marotaba bo‘g‘ib qo‘yib yuborgan vaqtda voyaga yetmagan bola o‘zini boshqarolmay bosh qismi bilan polga yiqilgan.

S.K. tushlikdan so‘ng ham harakatini davom ettirib, R.A.ni urishda davom etgan. Voyaga yetmagan E.A.ga R.A. uni onasidan so‘kkanligini aytib, yolg‘on gapirgan. Shunda voyaga yetmagan E.A. marhum boladan haqiqatdan ham so‘kdingmi deb so‘raganida u ha deb javob bergan. Keyin E.A. R.A.ning bosh qismiga bir necha marotaba urgan, tepgan va unga tan jarohati yetkazgan. Hushini yo‘qotgan 15 yoshli bola shifoxonaga olib ketilayotgan vaqtida vafot etgan, — deyiladi mas’ullar izohida.

Qo‘shimcha qilinishicha, mazkur holat yuzasidan Qo‘qon shahar prokuraturasi tomonidan Jinoyat kodeksining 104-moddasi 3-qismi “d” bandi (qasddan badanga og‘ir shikast yetkazish jabrlanuvchining o‘lishiga sabab bo‘lsa) bilan jinoyat ishi qo‘zg‘atilib, tergov harakatlari olib borilmoqda.