O‘zbekistonning Dehlidagi elchixonasi ko‘magida Xalq ta’limi vazirligi va Hindistonning CfBT Education Service kompaniyasi vakillari o‘rtasida onlayn-muzokaralar o‘tkazildi, deb xabar qilmoqda “Dunyo” axborot agentligi.
Qayd etilishicha, muloqotda O‘zbekiston xalq ta’limi vazirining birinchi o‘rinbosari Usmon Sharifxo‘jayev, elchi Dilshod Ahatov, CfBT Education Service kompaniyasi direktori Gudivaka Prasad boshqa mas’ul xodimlar ishtirok etgan.
Muzokaralarda ta’lim yo‘nalishidagi hamkorlikning yangi imkoniyatlari, xususan, maktablarda ingliz tilini o‘rgatish samaradorligini oshirish bo‘yicha ilg‘or tajribani joriy etish masalalari muhokama qilingan.
CfBT Education Service tashkiloti rahbari O‘zbekiston yoshlari orasida xorijiy tillarni targ‘ib etish va o‘qitishga qaratilgan e’tiborni yuqori baholab, bu borada amaliy hamkorlikka hissa qo‘shishga tayyorligini bildirgan. Shuningdek, ingliz tilidagi zamonaviy darsliklar holati, ularga bo‘lgan talab va ingliz tili o‘qituvchilarining malakasini oshirishning tashkiliy jihatlari bo‘yicha fikr almashilgan.
Izoh (0)