Qashqadaryo viloyati Shahrisabz tumanida 7-noyabr kuni boshqaruvni yo‘qotgan avtobus yo‘l-transport hodisasiga uchradi. Bu haqda viloyat Ichki ishlar boshqarmasi xabar qildi.
Qayd etilishicha, holat shu kuni soat 09:45 lar chamasida 4K-307 Shahrisabz—Miraki avtomobil yo‘lining 1-kilometrida sodir bo‘lgan. Shahrisabz tumani yo‘nalishidan harakatlanib kelayotgan Isuzu avtobusi haydovchisi N.A. rul boshqaruvini yo‘qotib ag‘darilib ketgan.
YTH oqibatida hech kim tan jarohati olmagan.
Mazkur holat yuzasidan surishtiruv harakatlari olib borilmoqda.
“Barcha haydovchilardan yo‘l harakati qoidalariga rioya qilib tezlik me’yorlariga qatiy amal qilishlarini so‘raymiz”, — deyiladi xabarda.
Qashqadaryo viloyati Transport boshqarmasi mazkur voqea bo‘yicha quyidagilarni qo‘shimcha qildi.
Davlat raqami 70 N 201 FA bo‘lgan Isuzu avtobusi yuridik jihatdan “Kesh-tur trans” MCHJga qarashli bo‘lib, Shahrisabz shahridan Shahrisabz tumanining Qutchi qishlog‘iga doimiy yo‘lovchi tashigan. Ushbu transport vositasining yo‘lovchi tashish huquqini beruvchi litsenziya varaqasi mavjud.
Ma’lum bo‘lishicha, yo‘l-transport hodisasi vaqtida avtobus salonida 10 dan ortiq yo‘lovchi bo‘lgan, ularga jiddiy zarar yetmagan.
Holat bo‘yicha huquq-tartibot organlari tomonidan surishtiruv ishlari olib borilmoqda.
Izoh (0)