Ўзбекистоннинг Деҳлидаги элчихонаси кўмагида Халқ таълими вазирлиги ва Ҳиндистоннинг CfBT Education Service компанияси вакиллари ўртасида онлайн-музокаралар ўтказилди, деб хабар қилмоқда «Дунё» ахборот агентлиги.
Қайд этилишича, мулоқотда Ўзбекистон халқ таълими вазирининг биринчи ўринбосари Усмон Шарифхўжаев, элчи Дилшод Аҳатов, CfBT Education Service компанияси директори Гудивака Прасад бошқа масъул ходимлар иштирок этган.
Музокараларда таълим йўналишидаги ҳамкорликнинг янги имкониятлари, хусусан, мактабларда инглиз тилини ўргатиш самарадорлигини ошириш бўйича илғор тажрибани жорий этиш масалалари муҳокама қилинган.
CfBT Education Service ташкилоти раҳбари Ўзбекистон ёшлари орасида хорижий тилларни тарғиб этиш ва ўқитишга қаратилган эътиборни юқори баҳолаб, бу борада амалий ҳамкорликка ҳисса қўшишга тайёрлигини билдирган. Шунингдек, инглиз тилидаги замонавий дарсликлар ҳолати, уларга бўлган талаб ва инглиз тили ўқитувчиларининг малакасини оширишнинг ташкилий жиҳатлари бўйича фикр алмашилган.
Изоҳ (0)