Shavkat Mirziyoyev raisligida 7-noyabr kuni sanoatni rivojlantirish masalalariga bag‘ishlangan videoselektor yig‘ilishi boshlandi. Bu haqda prezident matbuot xizmati xabar berdi.
Yig‘ilishda dunyodagi murakkab vaziyat, transport-logistika va ishlab chiqarish zanjirlaridagi uzilishlar, energoresurslar bilan bog‘liq muammolar mamlakatga ham ta’sir qilayotgani ta’kidlandi. Jahon moliya bozorlaridagi o‘zgarishlar ta’sirida chetdan jalb qilinadigan resurslar narxi oshayotgani qayd etildi.
Shu bois bosh vazir o‘rinbosarlari, vazirlar, tarmoq rahbarlari, hokimlar bu qiyin sharoitda imkoniyat izlashi, bor salohiyatni ishlatishi, taklif va tashabbus ko‘rsatishi kerakligi, kelgusi yilga o‘ziga aniq reja va mas’uliyat olishi shartligi ko‘rsatib o‘tildi.
Ta’kidlanishicha, 2022-yilning 9 oyida sanoat 5,3 foizga o‘sdi. Lekin 65 ta yirik hududiy korxonada ishlab chiqarish 1,6 trillion so‘mga kamaygan. Vazirlar Mahkamasiga ishlab chiqarish qisqargan tarmoqlardagi korxonalarga aylanma mablag‘i, solig‘i, transportiga yordam berib, to‘la quvvatga chiqarish bo‘yicha topshiriq berildi.
Sanoat zonalari infratuzilmasiga 2022-yilda 1,2 trillion so‘m ajratildi. Lekin Qashqadaryo, Samarqand va Xorazm viloyatlarida mablag‘larning 40 foizi ham o‘zlashtirilmagan. Mutasaddilar va viloyat hokimlariga haligacha infratuzilma olib borilmagan sanoat zonalariga shaxsan borib, ishlarni oxiriga yetkazish topshirildi.
Oxirgi 6 oyda hamkor davlatlar bozorlariga maishiy texnika eksporti – 3 barobar, transformator – 3,6 barobar, tibbiy buyumlar – 9 barobar, trikotaj mato – 2 barobar oshdi. Agar mis, PVX, metall, polipropilen xomashyolarini ko‘proq olish imkoniyati yaratilsa, tadbirkorlar eksportni bir necha barobar oshirishi mumkin. Lekin mas’ul vazirliklar bu masalalar bilan shug‘ullanmayotgani tanqid qilindi.
Misol uchun, gilam mahsulotlari ishlab chiqarish uchun yiliga 70 ming tonna polipropilenga talab bor. Biroq, birjaga 2 barobar kam polipropilen qo‘yilmoqda. Natijada narx 30 foizga oshib, tonnasi 1 ming 800 dollarga ko‘tarilgan.
Xuddi shunday, mebelchilikda ishlatiladigan formalin ichki bozorda 260 dollardan sotilyapti (raqobatchi bozorlarga nisbatan 60 dollarga qimmat). Yaratilgan sharoitlar va mablag‘ borligiga qaramasdan, mas’ul vazirliklar va mutasaddilar bu muammolar bilan shug‘ullanmayotgani tanqid qilindi.
1-dekabrgacha ishlab chiqaruvchi va treyderlar bilan ishlab, yetishmayotgan xomashyoni chetdan olib kelish hisobiga zaxira yaratish va grafik asosida uni birjaga qo‘yish topshirildi.
Izoh (0)