“Biz javobgar emasmiz, boshqa joyga murojaat qiling, deyishadi” — Bobur Rasulyev muammolar tashkilotlar orasida sansalor bo‘lishi haqida

“Daryo.uz” sayti Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 5-soni mavzusi “Toshkent ko‘chalari” bo‘lib, dastur mehmoni sifatida deputat, bloger Bobur Rasulyev taklif etildi.

Bobur Rasulyev suhbat davomida hududlardagi muammolarga to‘xtalib, ular bo‘yicha yuborilayotgan murojaatlar yetarlicha o‘rganilmasligi, javobgar tashkilotlar orasida sansalorlik mavjud ekani haqida gapirdi.

Bilasizmi, bundan 4 yil oldin Shayxontohur tumani deputati bo‘lganimda Nurafshon ko‘chasi bor edi. Ishlarni tez topshirish davrida shu ko‘cha yonidagi 9 qavatli uy hududini qazib tashlashgan va shu holicha qolib ketgan.

Buni bartaraf etish uchun 9 marta deputatlik so‘rovi yuborganman. Eng alam qilgani, o‘sha vaqt mobaynida 2 yillik deputatlik davrim tugadi. Masala esa unutildi. Har bitta tashkilot kelgan murojaatlarni bir-biriga jo‘natadi. Xatda chiroyli javob keladi. Unda ushbu tashkilot javobgar emasligi, boshqa tashkilotga murojaat qilish kerak ekani yozilgan bo‘ladi. Tashkilotlar ham o‘zgaraveradi.

Reorganizatsiya jarayoni sodir bo‘ladi, shuning hisobiga bitta tashkilot vazifasi boshqasiga o‘tadi yoki ikkiga bo‘linadi — ish bitmaydi. Rahbarlar ham o‘zgarib turaveradi. Oldingi rahbardan esa so‘rashning imkoni yo‘q, ish bitmay qolaveradi. Bu yerda, aytmoqchimanki, davlat idoralarining mutanosib ishlash jarayonida kamchilik bor. Hokimiyat tomonidan, deputatlar tomonidan harakatlar bo‘lyati, lekin baribir shu muammo mavjud, — deydi u.