10 ta chetlatish va muddatidan avval tugatilgan o‘yin. “Boka Xuniors” va “Rasing” o‘rtasidagi Superkubok bahsi oxiriga yetmay to‘xtatildi

Argentinaning “Boks Xuniors” va “Rasing” jamoalari o‘rtasida Chempionlar kubogi o‘yini bo‘lib o‘tdi.

Uchrashuv keskin o‘yin va tortishuvlarga boy bo‘ldi. Natijada “Boka Xuniors”ning yetti futbolchisi (besh nafar maydondagi va ikki nafar zaxiradagilar), shuningdek, bosh murabbiyiga qizil kartochka ko‘rsatilgan. Shu bois hakam o‘yinni muddatidan avval tugatishga majbur bo‘lgan.

“Rasing”ning ham uch nafar futbolchisi chetlatilgan. Shu tariqa bir o‘yinda 10 nafar futbolchi va bir murabbiy qizil kartochka olgan.

O‘yin “Rasing”ning 2:1 hisobidagi g‘alabasi bilan yakunlangan. Hakam o‘yinni to‘xtatgan vaqtda ikkinchi “over taym”ga qo‘shib berilgan daqiqalar o‘tib borayotgandi.

Chempionlar Kubogi Argentina chempionati g‘olibi va Professional Liga kubogi sohibi o‘rtasida o‘tkazib kelinadi. “Boka Xuniors” har ikki musobaqada ham g‘olib chiqqani bois ikkinchi finalchi nomi “Rasing” va “Tigre” jamoalar o‘rtasidagi o‘tish o‘yinidan keyin aniq bo‘lgandi.