“Manchester Yunayted”ni mag‘lub etgan Unai Emeri APLda Mourinyoning ko‘rsatkichini qayd etdi

“Aston Villa” Premyer Liga 15-turi doirasida kechgan bahsda “Manchester Yunayted”ni 3:1 hisobida mag‘lubiyatga uchratdi.

Bu “Aston Villa” bosh murabbiyi Unai Emeri uchun jamoa boshqaruvidagi debyut o‘yin edi. Emeri APL klubidagi debyut o‘yinida “Manchester Yunayted” ustidan g‘alaba qozongan tarixdagi to‘rtinchi murabbiyga aylandi.

Unga qadar “Sheffild” bilan Deyv Bassett (1992-yil), “Chelsi” bilan Joze Mourinyo (2004) va “Vest Hem” bilan Alan Kerbishli (2006) ushbu natijaga erishgandi.

Emeri 24-oktabr kuni “Aston Villa” bosh murabbiyi etib tayinlangandi. Ispaniyalik mutaxassis 1-noyabrga kelib ishlash huquqini oldi va o‘sha kundan rasman ishga kirishdi.

Avvalroq “Aston Villa” 1995-yilning avgustidan keyin ilk bor “Manchester Yunayted”ga qarshi uy o‘yinida g‘alaba qozongani xabar qilingandi.