Boks bo‘yicha OCH—2022. Ruslan Abdullayev va yana ikki nafar o‘zbekistonlik bokschi yarim finalga yo‘l oldi

Boks bo‘yicha 2022-yilgi Osiyo chempionatining 6-noyabr kungi bahslari yakunlandi.

-63,5 kg vazn toifasida O‘zbekiston sharafini himoya qilayotgan Ruslan Abdullayev chorak finalda Filippin vakili Jeyms Palistega qarshi bahs yuritdi. Unda Abdullayev katta ustunlik bilan g‘alaba qozonib, yarim final yo‘llanmasiga ega chiqdi.

Asadxo‘ja Mo‘ydinxo‘jayev (-67 kg) esa hindistonlik bokschi Amit Kumarga imkon qoldirmay, yarim finalga yo‘l oldi.

Farzona Fozilova (-48 kg) Iordaniya vakili Sara Qavasmiga qarshi ringga ko‘tarildi. O‘zbekistonlik bokschi raqibini ikkinchi raundda ikki bor nokdaun holatiga tushirdi. Uchinchi raunddagi yana bir nokdaundan keyin hakam jangni muddatidan avval to‘xtatdi va Fozilovaning g‘alabasini qayd etdi.

Dilfuza Bekova (-60 kg) tailandlik Porntip Buapaga qarshi jangda mag‘lubiyatga uchrab, musobaqa bilan xayrlashdi.

Avvalroq Abdumalik Halokov, Shahzod Muzaffarov va Adhamjon Muhiddinov ham yarim final yo‘llanmasiga ega chiqqandi.