Xerson viloyatining bosib olingan hududida joylashgan Skadovsk shahrida rossiyaparast politsiyachilar bilan ziddiyatga borgan 56 yoshli mahalliy fuqaro Tatyana Mudrenko omma oldida qatl etilgan. Bu haqda Financial Times voqea guvohlariga va marhumaning opasi Natalya Chyornayaga tayanib xabar bergan.
Ma’lum bo‘lishicha, Mudrenko hamshira bo‘lib ishlagan va Rossiya istilosiga qarshi faol norozilik ko‘rsatgan. So‘nggi ziddiyatlardan biri oktab boshida yuz bergan, o‘shanda u ukrainalik politsiyachilarga Rossiya harbiylari bilan hamkorlik qilayotgani uchun tanbeh bergan va “Skadovsk — bu Ukraina!” — deb qichqirgan.
Guvohlar so‘zlariga ko‘ra, shundan keyin ko‘p o‘tmay, ayol va uning turmush o‘rtog‘i Anatoliy Orexov hibsga olingan. 15-oktabr kuni Natalya Chyornayaga singlisi vafot etgani haqida xabar berishgan. Qo‘shnilari da’vo qilishicha, Mudrenkoning “og‘ziga nimadir tomizib”, so‘ng sud binosi oldiga osishgan. Orexov ozod etilgan, uning bir qo‘li singan, tanasida esa do‘pposlash izlari bo‘lgan. Mudrenkoning dafn marosimidan keyin u yana g‘oyib bo‘lgan.
Mudrenkoning opasiga topshirilgan, uning vafoti haqidagi guvohnomada o‘limga “mexanik asfiksiya”, ya’ni nafas yo‘llarining qisilishi natijasida nafas bo‘g‘ilishi sabab bo‘lgani aytiladi.
Financial Times jurnalistlari qayd etishicha, ular Tatyana Mudrenkoning o‘limi qay holatda yuz berganini mustaqil tasdiqlay olmaydi, biroq avvalroq, oktabr o‘rtalarida uning vafoti haqida Ukrainaning “Inson huquqlari uchun matbuot tashabbusi” huquqni himoya qilish guruhi va “Senzor.net” nashri xabar bergan.
Izoh (0)