Яқинда Туркманистонда ўрнатилган рекордни қайд этган шахс Гиннесс рекордлар китоби ташкилотига алоқаси йўқ бўлиб чиқди. Бу ҳақда «Хроника Туркменистана» хабар бермоқда.
28 октябрь куни Ахал вилоятининг айни пайтда барпо этилаётган янги пойтахти яқинида очиқ осмон остида собиқ президент Гурбангули Бердимуҳамедов кўрсатмасига мувофиқ, «Органик полизчилик ва унинг экологияга ҳиссаси» мавзусида семинар ўтказилган, унда 500 нафар агроном иштирок этган эди.
Ундан аввалроқ тадбирга тайёргарликни муҳокама қилиш учун Ашхободга «Жаҳон рекордларини ташкиллаштириш бўйича маслаҳатчи» Айдин Туркгужи келгани ва собиқ президент Гурбангули Бердимуҳамедов билан учрашгани хабар берилган.
Eurasianet нашри Гиннесс рекордлар китоби матбуот хизмати билан боғланиб, Туркгужи ташкилот ходими эмаслигини аниқлаган.
«Гиннесс рекордлар китоби вакилларидан ҳеч ким бу тадбирда қатнашмаган. Жаноб Туркгужи ташкилот вакили эмас, биз ОАВларда эълон қилинган хабарларга тузатиш киритиш учун у билан боғландик», — деган ташкилотдагилар.
Ҳодисанинг ўзи рекорлар китобига киритиш учун ҳозирча фақат даъвогарлик қилмоқда.
«Биз жамоамиз билан фото ва видео тасвирлар олдик, энди бу материалларни Жаҳон рекордлари ташкилотига юборамиз, шундан кейин ушбу тадбир Гиннесс рекордлар китобига кириш-кирмаслиги масаласи ҳал қилинади», — деган Айдин Туркгужи тадбирдан кейин.
Туркманистоннинг аввалги рекордлари
Туркманистон бундан аввал ҳам турли кўрсаткичлар бўйича Гиннеснинг рекордлар китобига киритилган. Хусусан, 2019 йил 8 августда Туркманбоши шаҳрида ташкил қилинган тадбир экология бўйича энг катта дарс сифатида қайд этилган.Ўша йилнинг ўзида Ашхободдаги олимпия шаҳарчасида саф тортган ҳолда энг узоқ давом эттирилган велосипед паради ўтказилган.
2018 йил 1 июнь куни эса «Ашхобод» стадионида велосипед спорти бўйича энг кўп одам иштирокидаги дарс уюштирилганди.
Шунингдек, 2017 йилда Ашхобод шаҳрида бунёд этилган олимпия шаҳарчисининг икки объекти Гиннес рекордлар китобидан жой олган эди.
Изоҳ (0)