4-noyabr, juma kuni, AQSH Pxenyan Rossiyaga Ukrainaga qarshi urush uchun artilleriya snaryadlarini yetkazib berayotganini ma’lum qilganidan keyin ikki kun o‘tib, Shimoliy Koreyadan Rossiyaga poyezd yetib keldi. Bu haqda Reuters Vashington tahlil markazining sun’iy yo‘ldosh tasvirlari asosidagi ma’lumotlariga tayanib xabar berdi.
Shimoliy Koreyada voqealar rivojini kuzatib boruvchi 38 North loyihasi ma’lum qilishicha, bu bir necha yil ichida ushbu yo‘nalishda poyezd harakati qayd etilishi bilan bog‘liq birinchi holatdir.
“Tasvirlarga qarab poyezdning harakatlanish maqsadini aniqlab bo‘lmaydi, lekin chegaraning kesib o‘tilishi Shimoliy Koreya tomonidan Rossiyaga qurol sotilishi haqidagi xabarlar fonida hamda ikki mamlakat o‘rtasida savdo tiklanishi kutilayotgan bir paytda sodir bo‘lmoqda”, — deyiladi 38 North xabarida.
Shimoliy Koreya Rossiya va KXDR o‘rtasida quruqlik orqali yagona yo‘l — 800 metrli Do‘§tlik ko‘prigini 2020-yil fevralida, koronavirus pandemiyasi chog‘ida yopgan edi.
Avvalroq Shimoliy Koreya Rossiyada o‘q-dorilar taqchilligi sharoitida unga artilleriya snaryadlarini yashirincha yetkazib berayotganini Oq uy Milliy xavfsizlik kengashining strategik aloqalar bo‘yicha koordinatori Jon Kirbi ma’lum qilgan edi.
Undan oldinroq The New York Times AQSH razvedkasining maxfiy ma’lumotlariga tayanib, Rossiya “noiloj” Shimoliy Koreyadan millionlab snaryad va raketalarni sotib olayotgani haqida xabar bergandi.
Pxenyan Donetsk va Lugansk xalq respublikalarini tan olganidan keyin Ukraina Shimoliy Koreya bilan diplomatik munosabatlarni uzgan. Kiyev bu harakatni mamlakat suvereniteti va hududiy yaxlitligini buzishga urinish sifatida baholagan.
Izoh (0)