4 ноябрь, жума куни, АҚШ Пхеньян Россияга Украинага қарши уруш учун артиллерия снарядларини етказиб бераётганини маълум қилганидан кейин икки кун ўтиб, Шимолий Кореядан Россияга поезд етиб келди. Бу ҳақда Reuters Вашингтон таҳлил марказининг сунъий йўлдош тасвирлари асосидаги маълумотларига таяниб хабар берди.
Шимолий Кореяда воқеалар ривожини кузатиб борувчи 38 North лойиҳаси маълум қилишича, бу бир неча йил ичида ушбу йўналишда поезд ҳаракати қайд этилиши билан боғлиқ биринчи ҳолатдир.
«Тасвирларга қараб поезднинг ҳаракатланиш мақсадини аниқлаб бўлмайди, лекин чегаранинг кесиб ўтилиши Шимолий Корея томонидан Россияга қурол сотилиши ҳақидаги хабарлар фонида ҳамда икки мамлакат ўртасида савдо тикланиши кутилаётган бир пайтда содир бўлмоқда», — дейилади 38 North хабарида.
Шимолий Корея Россия ва КХДР ўртасида қуруқлик орқали ягона йўл — 800 метрли Дў§тлик кўпригини 2020 йил февралида, коронавирус пандемияси чоғида ёпган эди.
Аввалроқ Шимолий Корея Россияда ўқ-дорилар тақчиллиги шароитида унга артиллерия снарядларини яширинча етказиб бераётганини Оқ уй Миллий хавфсизлик кенгашининг стратегик алоқалар бўйича координатори Жон Кирби маълум қилган эди.
Ундан олдинроқ The New York Times АҚШ разведкасининг махфий маълумотларига таяниб, Россия «ноилож» Шимолий Кореядан миллионлаб снаряд ва ракеталарни сотиб олаётгани ҳақида хабар берганди.
Пхеньян Донецк ва Луганск халқ республикаларини тан олганидан кейин Украина Шимолий Корея билан дипломатик муносабатларни узган. Киев бу ҳаракатни мамлакат суверенитети ва ҳудудий яхлитлигини бузишга уриниш сифатида баҳолаган.
Изоҳ (0)