Prezident administratsiyasi rahbari o‘rinbosari Komil Allamjonov ta’lim sohasini rivojlantirishga oid fikrlarini bildirib, yangicha usul o‘ylab topish o‘rniga jahon tajribasiga quloq tutish kerakligini aytdi.
“Ta’lim sohasida ham velosiped ixtiro qilmaslik kerak deb o‘ylayman. Dunyoda sinovdan o‘tgan eng ilg‘or tizimni shartta olib o‘zimizga adaptatsiya qilish kerak.
Matematika butun dunyoda matematika; fizika yoki kimyo qonunlari butun dunyoda bir xil. Darsliklar sifati va o‘qitish metodikasi har xil. Ulardan O‘zbekiston uchun eng ma’quli bu — Finlyandiyaniki, deb qaror qabul qildi mutaxassislar.
Finlyandiya ta’lim sohasidagi eng ilg‘or davlatlardan biri. Va reytinglarda doim eng yuqori o‘rinda. Shuning uchun ham prezidentimiz Finlyandiya tajribasini bizda qo‘llash topshirig‘ini berdi. Demak 1—4-sinflar fin standartlari asosida o‘zimizning mutaxassislar tomonidan yaratilayotgan bo‘lsa, 5—11-sinfning milliy mafkuramizga bog‘liq qismlari, ya’ni tarix, o‘zbek tili, adabiyot kabilarini o‘zimiz, tabiiy fanlar, ya’ni, fizika, kimyo, biologiya, anatomiya kabilarni esa eng zo‘r, tajribada sinalgan, katta natija beradiganini tayyorini olib o‘zimizga moslashtiramiz.
Qisqa aytsa qo‘limizdan kelganini o‘zimiz, kelmaydiganini tayyorini olamiz. Shunda ham vaqtdan yutamiz, ham sifatga erishamiz, ham mualliflar yetishmovchiligi masalasini yopamiz, inshaaolloh! Prezident administratsiyasi shu ishlarni muvofiqlashtiryapti, Xalq ta’limi vazirligi tashkil qilyapti. Qisqacha hisobot shu do‘stlar. Savollar bo‘lsa tayyorman”, — deb yozadi u.
Izoh (0)