O‘zbekistonda geografik obyektlarga jahon tarixida chuqur iz qoldirgan shaxslar ism-sharifini berish mumkin bo‘ldi

“Geografik obyektlarning nomlari to‘g‘risida”gi qonuniga o‘zgartish va qo‘shimchalar kiritish haqida”gi qonun 2-noyabr kuni prezident tomonidan imzolandi, deb xabar bermoqda Adliya vazirligi “Huquqiy axborot” kanali.

Qonunga ko‘ra, geografik obyektlarga jahon tarixida chuqur iz qoldirgan shaxslarning ismi-sharifini berishga yo‘l qo‘yildi.

Bunda O‘zbekiston yoki jahon tarixida chuqur iz qoldirgan shaxslarning ismi-sharifini berish ularning vafotidan keyin prezidentining qaroriga asosan hamda qoida tariqasida nomlari mavjud bo‘lmagan aholi punktlarining tarkibiy qismlariga nisbatan amalga oshiriladi.

Geografik obyektlarga nom berish va ularning nomlarini o‘zgartirish to‘g‘risida takliflar tayyorlash jarayonida mahalliy aholining fikri hisobga olinadi.

Takliflar kelib tushganidan keyin muhokama qilish uchun ularni 5 ish kunida tegishli organlar o‘zlarining rasmiy nashrlarida, rasmiy veb-saytlarida, shuningdek ommaviy axborot vositalarida e’lon qiladi.

Shuningdek, takliflar muhokamasi ular e’lon qilingan sanadan e’tiboran 15 kundan kam bo‘lmasligi kerak.

2020-yilda bosh vazir Abdulla Aripov qishloq va mahallalarning mantiqsiz nomlarini tanqid qilgandi. “Gap mahalliy hokimliklar, hududiy komissiyalarning ‘yetar, endi bu nomni o‘zgartiramiz’ deb, amaliy harakatni boshlashida qolgan. Joylarni nomlash nozik masala. Bunga jiddiy e’tibor qaratishimiz lozim. Bu sohada qonun hujjatlariga qat’iy rioya qilinishi lozim. Mahalliychilik, oshna-og‘aynigarchilik, xizmat martabasini suiiste’mol qilishga yo‘l qo‘ymaslik shart va zarur. Odamlarning ismlari bilan, shuningdek, tarixiy voqealar sharafiga nomlash va qayta nomlash sohasida belgilangan cheklovlarga rioya qilinishini ta’minlashimiz lozim bo‘ladi”, — degan edi Abdulla Aripov.