Toshkent shahrida 1-noyabr kuni yo‘l-patrul xizmati xodimlari Nexia-2 mashinasi oynasini urib sindirgani, qonuniy talablarga javob bermagan haydovchi qo‘lga olingani haqida xabar berilgandi. Toshkent shahar sudlari fuqaroga oid ma’muriy huquqbuzarlik to‘g‘risidagi ish yuzasidan ma’lumot berdi.
Ish hujjatlariga ko‘ra, huquqbuzar 1-noyabr kuni soat taxminan 17:00 lar atrofida o‘z boshqaruvida bo‘lgan Nexia-2 avtomashinasini Yunusobod tumani Shahrisabz va Amir Temur ko‘chalari kesishgan chorrahada hech qanday hujjatlarsiz boshqarib ketayotgan vaqtida IIO xodimlari tomonidan jezl yordamida to‘xtatilgan. Ammo haydovchi to‘xtash ishorasiga amal qilmay harakatni davom ettirib, voqea joyidan ketib qolgan. Ko‘rilgan chora-tadbirlar natijasida haydovchi to‘xtatilib, hujjatlarini tekshirish jarayonida, haydovchida avtomashina boshqarish uchun hech qanday hujjatlari mavjud emasligi aniqlangan.
Sudning qaroriga ko‘ra, A.X. Ma’muriy javobgarlik to‘g‘risidagi kodeksning 135-moddasi (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) 2-qismi hamda 194-moddasi (ichki ishlar organlari xodimining qonuniy talablarini bajarmaslik) 1-qismida nazarda tutilgan ma’muriy huquqbuzarlikni sodir qilgan deb topilgan.
Ma’muriy javobgarlik to‘g‘risidagi kodeksning 34-moddasiga asosan uzil-kesil, bazaviy hisoblash miqdorining 10 baravari miqdorida jarima jazosi tayinlangan.
Izoh (0)