Ijtimoiy tarmoqlarda Sirdaryo viloyati Yangiyer shahrida ichki ishlar xodimlari fuqaroga tan jarohati yetkazgani haqida xabar tarqaldi. Bosh prokuratura holat yuzasidan o‘rganish ishlari olib borildi.
Qayd etilishicha, 25-sentabr kuni huquqni muhofaza qiluvchi organ xodimlari tomonidan tezkor tadbir o‘tkazilgan. Unda U.T. (1992-yilda tug‘ilgan; muqaddam Jinoyat kodeksining 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) bilan sudlangan) Yangiyer shahridagi xonadonlarning birida yashovchi, muqaddam sudlangan Y.I. (1980-yilda tug‘ilgan)dan tarkibida kuchli ta’sir qiluvchi modda bo‘lgan dori vositalarini sotib olgan vaqtida ushlangan.
Tadbir davomida u qo‘lida bo‘lgan dori vositalarini yerga tashlab yuborib, faol qarshilik ko‘rsatgan va qochib ketishga harakat qilgan. Biroq u huquqni muhofaza qiluvchi organlari xodimlari tomonidan ushlab qolingan.
Mazkur holat yuzasidan 27-sentabr kuni Yangiyer shahar IIB tomonidan Jinoyat kodeksining 276-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) 2-qismi “a” bandi bilan jinoyat ishi qo‘zg‘atilgan.
Hozirda dastlabki tergov harakatlari olib borilmoqda.
28-sentabr kuni U.T.ning akasi ichki ishlar xodimlari ukasiga nisbatan kuch ishlatganini bildirib, prokuraturaga murojaat qilgan.
Hozirda Yangiyer shahar prokuraturasi tomonidan qo‘shimcha tergovga qadar tekshirish harakatlari olib borilmoqda.
Izoh (0)