KXDR ketma-ket ikkinchi kun ballistik raketalar uchirdi

Janubiy Koreya va Yaponiya harbiylari KXDR tomonidan Yapon dengiziga qarata ballistik raketa uchirilganini ma’lum qildi, deb yozadi Yonhap agentligi.

Yaponiya Mudofaa vazirligi ma’lumotlariga ko‘ra, parvoz 7:45 (Toshkent vaqti bilan 3:45)da amalga oshirilgan. Raketa Tinch okeaniga borib tushgani taxmin qilinmoqda. Voqea sababli, Yaponiyaning uchta prefekturasi — Miyagi, Yamagata va Niigata aholisiga boshpanalarga yashirinib olish tavsiya qilindi.

8:41 (4:41)da, Yaponiya Mudofaa vazirligi xabariga ko‘ra, Pxenyan ikkinchi ballistik raketani uchirgan. Keyinroq uchinchi parvoz ham amalga oshirildi. Janubiy Koreya harbiylari raketalardan biri uzoq masofali, ikkitasi — qisqa masofali bo‘lganini ma’lum qildi.

2-noyabr kuni ham Shimoliy Koreya ballistik raketalarni uchirgandi — Janubiy Koreyaning Ullindo oroliga qarata uchta raketa uchirilgan. U yerda havo trevogasi e’lon qilindi, biroq snaryadlar Yapon dengiziga kelib tushdi. O‘sha kuniyoq Pxenyan Yapon va Sariq dengizlarga qarata 100 ta artilleriya snaryadi va 17 ta raketa uchirdi. Uning bu xatti-harakatlariga javoban, Janubiy Koreya uchta raketa uchirdi.

Raketalar parvozlari AQSH va Janubiy Koreyaning Vigilant Storm qo‘shma harbiy havo mashg‘ulotlari fonida yuz bermoqda, KXDR unga qarshi chiqqan. Mashqlar 31-oktabr kuni boshlangan bo‘lib, 4-noyabrga qadar davom etadi. Manyovrlarga 240 dan ortiq samolyotlar, shu jumladan, Amerikaning takomillashtirilgan F-35A ko‘rinmas qiruvchilari jalb qilingan.

KXDR Seul va Vashingtonning mana shu va boshqa mashg‘ulotlari sababli, “Koreya yarim oroli qizg‘in nuqtaga aylantirib qo‘yilgani, u yerda harbiy keskinlik dunyo bo‘yicha eng kuchli ekani, mintaqadagi xavfsizlik muhiti esa yanada jiddiylashganini aytgandi.

Oktabr oyida Shimoliy Koreya besh martadan ko‘proq raketalar uchirdi, shuningdek, qanotli raketalarni sinovdan o‘tkazdi. Bundan tashqari, Janubiy va Shimoliy Koreya harbiylari o‘rtasida 24-oktabr kuni otishma yuz berdi: KXDR kemasi Sariq dengizda demarkatsiya chizig‘ini kesib o‘tgani tufayli Seul ogohlantiruvchi o‘t ochdi, Pxenyan bunga javoban baravar o‘t ochish reaktiv tizimlaridan 10 ta snaryad uchirdi.