“G‘alabadan keyin Qrimga boraman” — Zelenskiy Qrimga borib dengizni ko‘rish orzusi haqida gapirdi (video)

Ukraina prezidenti Vladimir Zelenskiy “Chexiya televideniyesi”ga bergan intervyusida Qrimda dengizni tomosha qilish orzusi haqida gapirdi.

“G‘alabadan keyin Qrimga boraman. Dengizni ko‘rishni juda xohlayman”, — dedi u jangovar harakatlar tugagandan so‘ng birinchi navbatda nima qilishi haqidagi savolga javoban.

Qrimga qachon borishni xohlashi haqidagi savolga javob berar ekan, Zelenskiy shunday dedi: “Qishda emas, albatta, chunki qishda dengizda nima qilib bo‘lardi. Kunlar iliganda boraman”.

O‘sha intervyu avvalida u Ukraina armiyasi Qrim qo‘lga kiritilgunga qadar hujumni davom ettirishini aytgan. “Chunki, agar ular (Rossiya kuchlari — “Daryo” izohi) Donbass va Qrimni tark etmasa, bu urushning tugashini anglatmaydi. Avval ham shunday holatni boshdan kechirganmiz. Bu faqatgina mojaroning muzlatib qo‘yilishi bo‘ladi”, — deb tushuntirdi Ukraina rahbari.

Ma’lumot uchun, 2014-yil mart oyida Qrimda referendum bo‘lib o‘tgan, unda yarimorol aholisining aksariyati Rossiyaga qo‘shilishni qo‘llab-quvvatlagan. Ukraina va bir qator G‘arb davlatlari ovoz berish natijalarini tan olmaydi va sodir bo‘lgan voqealarni “anneksiya” deb hisoblaydi. AQSH Qrimning Rossiyaga qo‘shilishini hech qachon tan olmaslikka so‘z bergan. Rossiya hukumati bir necha bor Qrim masalasi tarixan yopiq ekanini ta’kidlagan.

2022-yilning mart oyida Rossiya prezidenti matbuot kotibi Dmitriy Peskov Qrimning Rossiya hududi sifatida tan olinishi Ukrainadagi bosqinni to‘xtatishi mumkin bo‘lgan shartlardan biri bo‘lishini aytgan.