Shimoliy Koreya Rossiyada o‘q-dorilar taqchilligi sharoitida unga artilleriya snaryadlarini yashirincha yetkazib bermoqda. Bu haqda Oq uy Milliy xavfsizlik kengashining strategik aloqalar bo‘yicha koordinatori Jon Kirbi ma’lum qildi, deb yozadi CNN.
“Sentabr oyida KXDR Rossiyaga o‘q-dorilar yetkazib berish niyatini omma oldida rad etgandi. Biroq bizdagi ma’lumotlar shuni ko‘rsatadiki, KXDR Rossiyaning Ukrainadagi urushi uchun yashirincha katta miqdorda artilleriya snaryadlarini yetkazib bermoqda, bunda qurol-yarog‘larning asl manzili sir tutilmoqda” — dedi Kirbi.
Uning so‘zlariga ko‘ra, Shimoliy Koreya o‘q-dorilarni Yaqin Sharq yoki Afrika mamlakatlariga jo‘natilgandek qilib ko‘rsatishga urinmoqda, biroq aslida ularni Ukrainaga qarshi urushda qo‘llash uchun rossiyaliklar qabul qilib olmoqda.
Kirbi, shuningdek, AQSH jo‘natmalarni kuzatishda davom etishini qo‘shimcha qildi.
Avvalroq The New York Times AQSH razvedkasining maxfiy ma’lumotlariga tayanib, Rossiya “noiloj” Shimoliy Koreyadan millionlab snaryad va raketalarni sotib olayotgani haqida xabar bergandi.
Pxenyan Donetsk va Lugansk xalq respublikalarini tan olganidan keyin Ukraina Shimoliy Koreya bilan diplomatik munosabatlarni uzgan. Kiyev bu harakatni mamlakat suvereniteti va hududiy yaxlitligini buzishga urinish sifatida baholagan.
Izoh (0)