Arab davlatlari yetakchilari so‘nggi uch yil ichida ilk bor Jazoirda, Arab davlatlari Ligasining 31-sammitida uchrashdi, deb xabar bermoqda Deutsche Welle.
22 a’zodan iborat Arab davlatlari Ligasining bu yilgi sammiti Jazoirda bo‘lib o‘tmoqda. Liga Falastinning da’vosini qo‘llab-quvvatlashiga qaramay, uning ko‘plab a’zolari Isroil bilan munosabatlarni normallashtirgan. Uchrashuv Yaqin Sharq va Afrikada inflyatsiya o‘sib borayotgani, oziq-ovqat va energiya tanqisligi, qurg‘oqchilik va yashash narxining keskin oshib borayotgani fonida bo‘lib o‘tdi.
“Mintaqaviy va xalqaro kontekst o‘sib borayotgan keskinlik va inqirozlar bilan tavsiflanmoqda, ayniqsa, arab dunyosi hozir boshdan kechirayotgan qiyin davrni o‘zining zamonaviy tarixida hali ko‘rmagan edi”, — dedi Jazoir prezidenti Abdelmajid Tebbun.
Tebbun o‘z nutqida Rossiyaning Ukrainaga bosqinini tilga olmadi, biroq “favqulodda global holatlar oziq-ovqat xavfsizligiga ta’sir qiluvchi qutblanishni yuzaga keltirayotganini” ta’kidladi.
Nashr Ukrainadagi mojaro arab davlatlarining ko‘pchiligiga ta’sir ko‘rsatgani, chunki ulardan bir qanchasi Ukraina va Rossiya bug‘doyining eksportiga jiddiy qarab ekanini eslatdi.
“Bir qator boshqa sabablar: iqlim o‘zgarishi va tabiiy ofatlar bilan birga Ukrainadagi urush oziq-ovqat va energiya xavfsizligi inqirozini yanada kuchaytirdi”, — dedi Tunis prezidenti Qays Said sammitning ochilishidagi nutqida.
Eslatib o‘tamiz, arab davlatlari Ukrainadagi vaziyat bo‘yicha betarafligini e’lon qilgan.
Izoh (0)