AQSH Davlat departamenti minalarni zararsizlantirishga qaratilgan loyiha doirasida Ukrainaga shoshilinch gumanitar yordam ko‘rsatadigan Tetra Tech kompaniyasiga 47,6 million dollar ajratdi. Bu haqda Davlat departamenti matbuot xizmati xabar berdi.
Kompaniya ukrainaliklarga piyodalarga qarshi minalar, portlamay qolgan minalar, tashlandiq o‘q-dorilar, qo‘lbola portlovchi qurilmalar va boshqa portlovchi moslamalarni topish hamda zararsizlantirishni o‘rgatadi.
Loyiha Ukraina sapyorlar uyushmasi mahalliy nodavlat tashkiloti bilan sapyorlar guruhlarini tashkil etish bo‘yicha hamkorlikni ko‘zda tutadi.
“Ukraina hukumatining hisob-kitoblariga ko‘ra, mamlakat hududining 160 ming kvadrat kilometri ifloslangan bo‘lishi mumkin — bu maydon AQSHning Virjiniya, Merilend va Konnektikut shtatlari hududiga teng”, — deyiladi departament xabarida.
Loyiha Ukrainaga minalardan tozalash uchun 91,5 million dollar ajratishni nazarda tutadi. Vashington bu pullarni Kiyevga kelasi yil davomida to‘liq o‘tkazadi.
Izoh (0)