Turkiya prezidenti Rajab Toyyib Erdo‘g‘on Anqarada so‘zlagan nutqida Ukraina portlaridan gumanitar yo‘lak orqali don eksporti bugun, 2-noyabr kuni tushdan keyin qayta boshlanganini ma’lum qildi. Bu haqda Bloomberg xabar bermoqda.
Erdo‘g‘onning so‘zlariga ko‘ra, Rossiya mudofaa vaziri Sergey Shoygu Turkiya mudofaa vaziri Hulusi Akarga gumanitar yo‘lak Moskva vaqti bilan 12:00 da (Toshkent vaqti bilan 14:00) qayta ish boshlagani haqida ma’lum qilgan.
Rossiya Mudofaa vazirligi Rossiya BMT va Turkiya yordami bilan Ukrainadan zarur yozma kafolatlarni olganidan keyin Ukrainadan don eksport qilish bo‘yicha kelishuvda ishtirok etishni qayta boshlaganini ta’kidladi. Ushbu kafolatlarga ko‘ra, Ukrainaning gumanitar koridor va portlaridan Rossiyaga qarshi jangovar harakatlar uchun foydalanilmaydi.
“Rossiya Federatsiyasi hozirda olingan kafolatlar yetarli, deb hisoblaydi va kelishuvni amalga oshirishni davom ettiradi”, — deyilgan Rossiya Mudofaa vazirligi bayonotida.
29-oktabr kuni Rossiya iyul oyida Turkiya va BMT vositachiligida Ukraina portlaridan don va o‘g‘it eksport qilish bo‘yicha kelishuvdagi ishtirokini to‘xtatgan edi. Rossiya hukumati bunday qarorni Ukraina dronlari Sevastopolda Qora dengiz floti kemalariga hujum qilganidan keyin xavfsizlik nuqta’i nazaridan qabul qilganini tushuntirdi.
Ukraina portlaridan don va o‘g‘it eksport qilish bo‘yicha kelishuv 120 kunga, ya’ni 2022-yil 19-noyabrgacha mo‘ljallangan. Tomonlarning hech biri e’tiroz bildirmasa, u avtomatik ravishda uzaytirilishi mumkin.
Izoh (0)