Afg‘onistonda ko‘knori yetishtirish 2021-yilga nisbatan 32 foizga oshib, 233 ming gektarni tashkil qildi. Bu haqda Birlashgan Millatlar Tashkilotining Narkotiklar va jinoyatchilik bo‘yicha boshqarmasi hisobotida aytiladi.
Asosiy ekin maydonlari Afg‘onistonning janubi-g‘arbiy viloyatlariga to‘g‘ri keladi — ular ko‘knori yetishtiriladigan umumiy maydonning 73 foizini tashkil qiladi va hosildorlikning eng katta o‘sishi ham shu yerda kuzatilgan. BMT hisobotiga ko‘ra, Helmand viloyatida ekin maydonlarining beshdan bir qismi ko‘knoriga ajratilgan.
“ ‘Tolibon’ shu yilning aprel oyida ko‘knori yetishtirishni taqiqlaganini e’lon qilganidan so‘ng, opium narxi ko‘tarildi. Fermerlarning ko‘knori sotishdan tushgan daromadi 2021-yildagi 425 million dollardan 2022-yilda 1,4 milliard dollarga yetdi, bu yangi ko‘rsatkich 2021-yilda qishloq xo‘jaligi sektoridan olingan umumiy daromadning 29 foiziga teng. 2021-yilda opiat sotishdan olingan daromad qishloq xo‘jaligidan olingan umumiy daromadning atigi 9 foizini tashkil qilgandi”, — deyiladi hisobotda.
Shu bilan birga, hujjatda ko‘knori sotishdan tushgan daromadning oshishi xarid qobiliyatiga ta’sir ko‘rsatmagani, chunki o‘sha davrda inflyatsiya keskin o‘sgani va oziq-ovqat mahsulotlari narxi o‘rtacha 35 foizga oshgani qayd etilgan.
“BMT Narkotiklar va jinoyatchilik bo‘yicha boshqarmasi Giyohvand moddalar monitoringi platformasi tomonidan aniqlangan musodara holatlari Afg‘onistondan opiat savdosi 2021-yil avgustidan buyon uzluksiz davom etganini ko‘rsatadi. Afg‘on opiatlari dunyodagi barcha noqonuniy opiat bozorining qariyb 80 foizini ta’minlaydi”, — deyiladi boshqarma hisobotida.
Mutaxassislar “Tolibon” hokimiyatni qo‘lga kiritganidan so‘ng Afg‘onistondan giyohvand moddalar savdosi sezilarli darajada oshadi, degan xavotirni bir necha bor bildirishgan, chunki qishloqlarda yashovchi afg‘onlarning ko‘pchiligi uchun ko‘knori yetishtirish va opiy sotish uzoq vaqtdan beri asosiy daromad bo‘lib kelgan. Falokatli iqtisodiy vaziyat va oziq-ovqat muammosi ortib borayotgan bir paytda, afg‘onlarning narkotik biznesiga qaramligi yanada kuchaymoqda.
Izoh (0)