Hindiston politsiyasi Gujarat shtatida piyodalar ko‘prigining qulashi ortidan 9 kishini, jumladan, chipta sotuvchi va pudratchilarni hibsga oldi. Ushbu ko‘prik qulashi oqibatida 140 dan ortiq odam halok bo‘lgan edi, ularning aksariyati bolalar.
Huquq-tartibot idoralari xodimlari videokuzatuv kameralaridagi tasvirlarni ko‘zdan kechirib, fojia yuz berishi oldidan bir guruh yoshlar ko‘prikni u yoqdan bu yoqqa tebratayotganini payqab qolgan.
Jabrlanuvchilardan biri Ashvin Mehra ham ko‘prikda uni tebratishga uringan odamlar bo‘lganini aytdi.
“20-25 yoshlardagi 20 ga yaqin yigit ko‘prikni tebratdi. Biz uch marta qandaydir tovushlarni eshitdik, oltinchi marta ko‘prik arqoni to‘satdan uzilib ketdi”, — dedi u.
Politsiyaning yuqori martabali mulozimiga ko‘ra, to‘qqiz kishi, jumladan, boshqaruv xodimlari, kassirlar va uch qo‘riqchi ko‘prikdagi olomonni nazorat qila olmagani uchun hibsga olingan. Qo‘lga olinganlar orasida obyektni ta’mirlash uchun shartnoma olgan ikki kishi ham bor. Uning qo‘shimcha qilishicha, yana ko‘proq odamlar hibsga olinishi mumkin.
Mahalliy rasmiylar ko‘prik uchun mas’ul kompaniya ularga ko‘prik ta’mirdan so‘ng qayta ochilgani haqida xabar bermaganini, uning foydalanishga yaroqliligi to‘g‘risida hech qanday sertifikat yo‘qligini qo‘shimcha qildi.
Eslatib o‘tamiz, 30-oktabr kuni Hindistonning Gujarat shtati Morvi shahrida osma ko‘prik ustidagi odamlar bilan birga qulab tushgan edi. XIX asrda qurilgan ko‘prik yetti oylik ta’mirdan so‘ng qayta ochilgan bo‘lgan.
Izoh (0)