Don bitimi doirasida kelishib olingan xavfsiz yo‘lak orqali kemalar harakati to‘xtatildi. Bu haqda Rossiya Mudofaa vazirligi xabar berdi.
Muassasa kemalar harakatini “nomaqbul” deb atadi, chunki, Moskva talqiniga ko‘ra, “Ukraina rahbariyati va Ukraina qurolli kuchlari qo‘mondonligi undan Rossiya Federatsiyasiga qarshi jangovar harakatlar olib borish uchun foydalanmoqda”.
Mudofaa vazirligi bayonotida ta’kidlanishicha, Rossiya bitimdan uzil-kesil chiqmaydi, shunchaki uning amal qilishini to‘xtatadi — yo‘lak Ukraina tomonidan jangovar harakatlar uchun foydalanmasligi bo‘yicha kafolatlar berilguniga qadar.
Rossiya don bitimini chiqishini 29-oktabr kuni, Sevastopol portidagi kemalar dronlar hujumiga uchraganidan keyin e’lon qilgan edi. Rossiya Mudofaa vazirligi da’vo qilishicha, dronlardan biri Ukraina doni ortilgan kemadan uchirilgan.
BMT esa 31-oktabr kuni Sevastopolga hujum don bitimi shartlarini buzgan deb hisoblamasligini ma’lum qildi. Tashkilot bitim amal qilishda davom etyapti, deb hisoblashini ta’kidladi.
Don bitimi
“Don bitimi” Rossiya va Ukraina tomonidan alohida-alohida Turkiya va BMT bilan 22-iyulda imzolangan edi. Tomonlar don ortilgan kemalar Qora dengiz orqali o‘tishi uchun xavfsiz yo‘lak yaratish majburiyatini oldi, BMT, Turkiya va Ukraina vakillari harbiy yuklar ortilishini istisno qilish uchun nazorat olib borishga kelishib oldi. Bitim uzaytirish imkoniyati bilan uch oyga tuzildi. Birinchi yuk kemasi Odessa portidan 1-avgust kuni chiqib ketdi.24-fevral kuni Rossiya operatsiyasi boshlanganidan keyin Ukraina portlaridan don ortilgan kemalar chiqolmay qolgan edi. Kiyev va G‘arb mamlakatlari bunda Moskvani aybladi va oziq-ovqat inqirozi haqida ogohlantirdi. Rossiya, o‘z navbatida, portlar ukrainalik harbiylar tomonidan minalashtirilgani tufayli oziq-ovqat chiqib ketolmayotganini da’vo qildi. Oxir-oqibat, u yerda, turli hisob-kitoblarga ko‘ra, 4,5 milliondan 20 million tonnagacha bug‘doy va makkajo‘xori to‘planib qoldi.
Don bitimi muddati noyabr oxirida tugashi, barcha tomonlar rozi bo‘lgan taqdirda, shartnoma uzaytirilishi mumkin edi.
Rossiya o‘z ishtirokini to‘xtatdi
29-oktabr kuni Ukraina dronlari don yo‘lagi xavfsizligini ta’minlashga jalb qilingan Qora dengiz floti kemalariga hujum qilgach, Rossiya don bitimidagi ishtirokini “noma’lum muddatga” to‘xtatib qo‘ydi. AQSH va Yevroittifoq Moskvani bu qarorni bekor qilishga chaqirdi. BMT va Turkiya don bitimini xavf ostiga qo‘yuvchi qadamlarga qarshi chiqdi.Rossiya Mudofaa vazirligi Ukraina qurolli kuchlari hujumni Britaniya Harbiy-dengiz kuchlari mutaxassislari rahbarligi ostida amalga oshirganini aytmoqda. Rossiyaning don bitimiga qaytishi haqida kemaga uyushtirilgan hujum yuzasidan surishtiruv olib borilganidan keyin gapirish mumkin bo‘ladi, dedi Rossiya tashqi ishlar vaziri o‘rinbosari Andrey Rudenko.
Izoh (0)