Ҳиндистон полицияси Гужарат штатида пиёдалар кўпригининг қулаши ортидан 9 кишини, жумладан, чипта сотувчи ва пудратчиларни ҳибсга олди. Ушбу кўприк қулаши оқибатида 140 дан ортиқ одам ҳалок бўлган эди, уларнинг аксарияти болалар.
Ҳуқуқ-тартибот идоралари ходимлари видеокузатув камераларидаги тасвирларни кўздан кечириб, фожиа юз бериши олдидан бир гуруҳ ёшлар кўприкни у ёқдан бу ёққа тебратаётганини пайқаб қолган.
Жабрланувчилардан бири Ашвин Меҳра ҳам кўприкда уни тебратишга уринган одамлар бўлганини айтди.
«20-25 ёшлардаги 20 га яқин йигит кўприкни тебратди. Биз уч марта қандайдир товушларни эшитдик, олтинчи марта кўприк арқони тўсатдан узилиб кетди», — деди у.
Полициянинг юқори мартабали мулозимига кўра, тўққиз киши, жумладан, бошқарув ходимлари, кассирлар ва уч қўриқчи кўприкдаги оломонни назорат қила олмагани учун ҳибсга олинган. Қўлга олинганлар орасида объектни таъмирлаш учун шартнома олган икки киши ҳам бор. Унинг қўшимча қилишича, яна кўпроқ одамлар ҳибсга олиниши мумкин.
Маҳаллий расмийлар кўприк учун масъул компания уларга кўприк таъмирдан сўнг қайта очилгани ҳақида хабар бермаганини, унинг фойдаланишга яроқлилиги тўғрисида ҳеч қандай сертификат йўқлигини қўшимча қилди.
Эслатиб ўтамиз, 30 октябрь куни Ҳиндистоннинг Гужарат штати Морви шаҳрида осма кўприк устидаги одамлар билан бирга қулаб тушган эди. XIX асрда қурилган кўприк етти ойлик таъмирдан сўнг қайта очилган бўлган.
Изоҳ (0)