Ukraina, Turkiya va BMT delegatsiyalari Qo‘shma koordinatsiya markazida kemalarning, shu jumladan Ukraina portlaridan 12 ta kemaning 31-oktabr kuni gumanitar yo‘lak bo‘ylab harakatlanish rejasini kelishib oldi, deb xabar berdi “RBK” 30-oktabr kuni kechqurun.
“Ukraina, Turkiya va BMT delegatsiyalari ertaga, 31-oktabr kuni dengizdagi gumanitar yo‘lak orqali o‘tadigan 14 ta kema — Ukrainadan chiqadigan 12 ta va u yerga boradigan 2 ta kemaning harakatlanish rejasini kelishib oldi. BMT delegatsiyasi Rossiya delegatsiyasini Qo‘shma koordinatsiya markazi tomonidan belgilangan jarayonlarga muvofiq, kemalar harakatlari haqida xabardor qildi”, — deyiladi xabarda.
Aniqlik kiritilishicha, markaz tartibiga ko‘ra, tijorat kemalari “don kelishuvi” doirasida xavfsiz o‘tishi uchun, barcha ishtirokchilar o‘z harakatlarini harbiy va boshqa organlari bilan muvofiqlashtiradi.
Yana oltita kema don bitimi doirasida Ukraina portlaridan 30-oktabr kuni chiqqan.
Ayni paytda Rossiyaning Qo‘shma koordinatsiya markazidagi manbasi ma’lum qilishicha, Kiyev, Anqara va BMT tomonidan don bitimi doirasida kemalar harakati haqida qabul qilingan qarorlar Rossiyaga hech qanday majburiyatni yuklamaydi. “Biz o‘z ishtirokimizni to‘xtatganmiz va bu haqda Qo‘shma koordinatsiya markazini rasman xabardor qilganmiz. Bizsiz qabul qilingan qarorlar bizga hech qanday majburiyat yuklamaydi”, — dedi u.
Don bitimi
“Don bitimi” Rossiya va Ukraina tomonidan alohida-alohida Turkiya va BMT bilan 22-iyulda imzolangan edi. Tomonlar don ortilgan kemalar Qora dengiz orqali o‘tishi uchun xavfsiz yo‘lak yaratish majburiyatini oldi, BMT, Turkiya va Ukraina vakillari harbiy yuklar ortilishini istisno qilish uchun nazorat olib borishga kelishib oldi. Bitim uzaytirish imkoniyati bilan uch oyga tuzildi. Birinchi yuk kemasi Odessa portidan 1-avgust kuni chiqib ketdi.24-fevral kuni Rossiya operatsiyasi boshlanganidan keyin Ukraina portlaridan don ortilgan kemalar chiqolmay qolgan edi. Kiyev va G‘arb mamlakatlari bunda Moskvani aybladi va oziq-ovqat inqirozi haqida ogohlantirdi. Rossiya, o‘z navbatida, portlar ukrainalik harbiylar tomonidan minalashtirilgani tufayli oziq-ovqat chiqib ketolmayotganini da’vo qildi. Oxir-oqibat, u yerda, turli hisob-kitoblarga ko‘ra, 4,5 milliondan 20 million tonnagacha bug‘doy va makkajo‘xori to‘planib qoldi.
Don bitimi muddati noyabr oxirida tugashi, barcha tomonlar rozi bo‘lgan taqdirda, shartnoma uzaytirilishi mumkin edi.
Rossiya o‘z ishtirokini to‘xtatdi
29-oktabr kuni Ukraina dronlari don yo‘lagi xavfsizligini ta’minlashga jalb qilingan Qora dengiz floti kemalariga hujum qilgach, Rossiya don bitimidagi ishtirokini “noma’lum muddatga” to‘xtatib qo‘ydi. AQSH va Yevroittifoq Moskvani bu qarorni bekor qilishga chaqirdi. BMT va Turkiya don bitimini xavf ostiga qo‘yuvchi qadamlarga qarshi chiqdi.Rossiya Mudofaa vazirligi Ukraina qurolli kuchlari hujumni Britaniya Harbiy-dengiz kuchlari mutaxassislari rahbarligi ostida amalga oshirganini aytmoqda. Rossiyaning don bitimiga qaytishi haqida kemaga uyushtirilgan hujum yuzasidan surishtiruv olib borilganidan keyin gapirish mumkin bo‘ladi, dedi Rossiya tashqi ishlar vaziri o‘rinbosari Andrey Rudenko.
Izoh (0)