Украина, Туркия ва БМТ делегациялари Қўшма координация марказида кемаларнинг, шу жумладан Украина портларидан 12 та кеманинг 31 октябрь куни гуманитар йўлак бўйлаб ҳаракатланиш режасини келишиб олди, деб хабар берди «РБК» 30 октябрь куни кечқурун.
«Украина, Туркия ва БМТ делегациялари эртага, 31 октябрь куни денгиздаги гуманитар йўлак орқали ўтадиган 14 та кема — Украинадан чиқадиган 12 та ва у ерга борадиган 2 та кеманинг ҳаракатланиш режасини келишиб олди. БМТ делегацияси Россия делегациясини Қўшма координация маркази томонидан белгиланган жараёнларга мувофиқ, кемалар ҳаракатлари ҳақида хабардор қилди», — дейилади хабарда.
Аниқлик киритилишича, марказ тартибига кўра, тижорат кемалари «дон келишуви» доирасида хавфсиз ўтиши учун, барча иштирокчилар ўз ҳаракатларини ҳарбий ва бошқа органлари билан мувофиқлаштиради.
Яна олтита кема дон битими доирасида Украина портларидан 30 октябрь куни чиққан.
Айни пайтда Россиянинг Қўшма координация марказидаги манбаси маълум қилишича, Киев, Анқара ва БМТ томонидан дон битими доирасида кемалар ҳаракати ҳақида қабул қилинган қарорлар Россияга ҳеч қандай мажбуриятни юкламайди. «Биз ўз иштирокимизни тўхтатганмиз ва бу ҳақда Қўшма координация марказини расман хабардор қилганмиз. Бизсиз қабул қилинган қарорлар бизга ҳеч қандай мажбурият юкламайди», — деди у.
Дон битими
«Дон битими» Россия ва Украина томонидан алоҳида-алоҳида Туркия ва БМТ билан 22 июлда имзоланган эди. Томонлар дон ортилган кемалар Қора денгиз орқали ўтиши учун хавфсиз йўлак яратиш мажбуриятини олди, БМТ, Туркия ва Украина вакиллари ҳарбий юклар ортилишини истисно қилиш учун назорат олиб боришга келишиб олди. Битим узайтириш имконияти билан уч ойга тузилди. Биринчи юк кемаси Одесса портидан 1 август куни чиқиб кетди.24 февраль куни Россия операцияси бошланганидан кейин Украина портларидан дон ортилган кемалар чиқолмай қолган эди. Киев ва Ғарб мамлакатлари бунда Москвани айблади ва озиқ-овқат инқирози ҳақида огоҳлантирди. Россия, ўз навбатида, портлар украиналик ҳарбийлар томонидан миналаштирилгани туфайли озиқ-овқат чиқиб кетолмаётганини даъво қилди. Охир-оқибат, у ерда, турли ҳисоб-китобларга кўра, 4,5 миллиондан 20 миллион тоннагача буғдой ва маккажўхори тўпланиб қолди.
Дон битими муддати ноябрь охирида тугаши, барча томонлар рози бўлган тақдирда, шартнома узайтирилиши мумкин эди.
Россия ўз иштирокини тўхтатди
29 октябрь куни Украина дронлари дон йўлаги хавфсизлигини таъминлашга жалб қилинган Қора денгиз флоти кемаларига ҳужум қилгач, Россия дон битимидаги иштирокини «номаълум муддатга» тўхтатиб қўйди. АҚШ ва Евроиттифоқ Москвани бу қарорни бекор қилишга чақирди. БМТ ва Туркия дон битимини хавф остига қўювчи қадамларга қарши чиқди.Россия Мудофаа вазирлиги Украина қуролли кучлари ҳужумни Британия Ҳарбий-денгиз кучлари мутахассислари раҳбарлиги остида амалга оширганини айтмоқда. Россиянинг дон битимига қайтиши ҳақида кемага уюштирилган ҳужум юзасидан суриштирув олиб борилганидан кейин гапириш мумкин бўлади, деди Россия ташқи ишлар вазири ўринбосари Андрей Руденко.
Изоҳ (0)