Turkiyaning Baykar kompaniyasi tez orada Ukrainaga “havo — havo” sinfidagi raketalar bilan jihozlangan va kamikadze dronlarga qarshi kurashishga qodir bo‘lgan uchuvchisiz uchar qurilmalarni yetkazib berishni rejalashtirmoqda. Bu haqda kompaniya bosh direktori Xaluk Bayrajtar Deutsche Presse-Agentur agentligiga ma’lum qilgan.
“Tez orada bizning Bayraktar TB2 va Bayraktar Akıncı dronlarimiz ‘havo — havo’ sinfidagi raketalar bilan jihozlanadi, ular nafaqat uchuvchisiz uchar qurilmalarni, balki samolyotlarni ham urib tushirishi mumkin… biz sinovlar o‘tkazyapmiz”, — dedi u.
SAHA Expo ko‘rgazmasi chog‘ida Turkiyaning raketalar ishlab chiqaruvchi Roketsan kompaniyasi va Bayraktar o‘rtasida Sungur zenit raketasini dronlar bilan kurashish uchun integratsiya qilish haqida shartnoma tuzilgan.
“Sungur sinovdan o‘tgan o‘q, ayniqsa, vertolyot va uchuvchisiz uchar qurilmalar kabi harakatlanuvchi nishonlarga qarshi. Uning ‘havo — havo’ sinfidagi raketa sifatida dronlarimizda qo‘llanilishi o‘yin qoidalarini o‘zgartirib yuboradi”, — dedi Roketsan bosh direktori Murat Ikinchi.
Bayraktar va Ukraina hamkorligi
Turkiyaning Bayraktar TB2 zarba beruvchi uchuvchisiz uchar qurilmalar ishlab chiqarishga ixtisoslashgan Baykar kompaniyasi Ukrainada o‘z bo‘linmasini ochdi va ushbu mamlakatda zavod qurishga tayyorlanmoqda. Ukrainada bunday zavod ikki yil ichida qurib bitkazilishi ma’lum qilindi.19-iyul kuni Ukraina Vazirlar mahkamasi vakili Taras Melnichuk mamlakat hukumati Turkiya bilan yuqori texnologiyalar, aviatsiya va koinot sohalaridagi hamkorlik haqidagi kelishuvni ratifikatsiya qilish to‘g‘risidagi qonun loyihasini ma’qullaganini aytgandi, u Ukrainada Turkiyaning Bayraktar zarba beruvchi uchuvchisiz uchar qurilmalarini ishlab chiqarish va ularga xizmat ko‘rsatish bo‘yicha zavod qurilishini boshlash imkoniyatini berishi ma’lum qilingandi.
2021-yil yanvarida SAHA EXPO mudofaa sanoati mahsulotlari ko‘rgazmasida Baykar va Ukrainaning “Ivchenko progress” konstruktor byurosi yangi MUIS uchuvchisiz uchar qurilmalar uchun dvigatellar yetkazib berish bo‘yicha shartnoma imzolagandi.
Keyinroq Bloomberg manbalari Ukraina Turkiyadan oltitadan ortiq dronlar sotib olganini ma’lum qildi. Yana kamida 20 ta dron uchun buyurtma ishlab chiqish bosqichida turibdi.
Avvalroq Ukraina prezidenti Vladimir Zelenskiy Bayraktar uchuvchisiz uchar qurilmalar ishlab chiqaruvchi kompaniya rahbari Xaluk Bayraktarni mukofot bilan taqdirlagan edi.
Eron dronlari atrofidagi mojaro
Rossiyaga kamikadze dronlarni Eron yetkazib berayotgani haqida AQSH va Yevropa mamlakatlari hukumatlari gapirgandi. Bu haqda Amerika OAVlari ham yozgandi. Xususan, The Washington Post manbalariga ko‘ra, Tehron Moskvaga “o‘nlab” Mohajer-6 va ko‘p sonli Shahed-136 uchuvchisiz uchar qurilmalarini taqdim etmoqchi bo‘lgan. 20-oktabr kuni Yevroittifoq Eronning dron ishlab chiqaruvchi Shahed kompaniyasiga qarshi sanksiyalar kiritdi.Rossiyaning BMTdagi missiyasi G‘arb mamlakatlari ma’lumotlarini dezinformatsiya kampaniyasi hamda Moskva va Tehronga bosim o‘tkazish uchun to‘qib chiqarilgan bahona deb atadi. Eronning BMTdagi doimiy vakili Amid Said Iravaniy ham dronlar yetkazib berilayotgani haqidagi ayblovlar asossiz ekanini aytgandi.
Mavzuga doir:
Izoh (0)