Navoiy viloyatida fuqaro IIB xodimlari tomonidan majburiy olib ketilayotgani, buni tasvirga olgan fuqaro telefonini tortib olishga uringani aks etgan video ijtimoiy tarmoqlarda tarqaldi.
Viloyat prokuraturasining ma’lum qilishicha, Xatirchi tumanida yashovchi fuqaro D.SH. tomonidan tuman IIB xodimlarining xatti-harakatlaridan noroziligi haqida tuman prokuraturasiga murojaat yo‘llangan.
Mazkur holat yuzasidan Xatirchi tuman prokuraturasi tomonidan tergovga qadar tekshirish harakatlari olib borilayotgan bo‘lib, sud-tibbiyot ekspertizasi tayinlangan.
Navoiy viloyati IIB matbuot xizmati bergan xabarga ko‘ra, videoda aks etgan voqea 23-aprelda yuz bergan. Xatirchi tumanida yashovchi fuqaro M.Y va S.R. shu hududdagi 52-son maktabda olib borilayotgan qurilishga borib, ta’mirlash ishlari haqida gapirib, ustalar bilan o‘rtalarida tortishuv ro‘y bergan.
Holatga aniqlik kiritish maqsadida profilaktika inspektorlari fuqaroni mahalla binosiga olib kelib, u bilan profilaktik suhbat olib borgan va shundan so‘ng fuqaro qo‘yib yuborilgan.
Ushbu holatda xodimlarning harakatiga huquqiy baho berish maqsadida Navoiy viloyat IIB mas’ullari tomonidan xizmat tekshiruvi o‘tkazilgan hamda tegishli intizomiy chora qo‘llangan.
Izoh (0)