Навоий вилоятида фуқаро ИИБ ходимлари томонидан мажбурий олиб кетилаётгани, буни тасвирга олган фуқаро телефонини тортиб олишга урингани акс этган видео ижтимоий тармоқларда тарқалди.
Вилоят прокуратурасининг маълум қилишича, Хатирчи туманида яшовчи фуқаро Д.Ш. томонидан туман ИИБ ходимларининг хатти-ҳаракатларидан норозилиги ҳақида туман прокуратурасига мурожаат йўлланган.
Мазкур ҳолат юзасидан Хатирчи туман прокуратураси томонидан терговга қадар текшириш ҳаракатлари олиб борилаётган бўлиб, суд-тиббиёт экспертизаси тайинланган.
Навоий вилояти ИИБ матбуот хизмати берган хабарга кўра, видеода акс этган воқеа 23 апрелда юз берган. Хатирчи туманида яшовчи фуқаро М.Й ва С.Р. шу ҳудуддаги 52-сон мактабда олиб борилаётган қурилишга бориб, таъмирлаш ишлари ҳақида гапириб, усталар билан ўрталарида тортишув рўй берган.
Ҳолатга аниқлик киритиш мақсадида профилактика инспекторлари фуқарони маҳалла биносига олиб келиб, у билан профилактик суҳбат олиб борган ва шундан сўнг фуқаро қўйиб юборилган.
Ушбу ҳолатда ходимларнинг ҳаракатига ҳуқуқий баҳо бериш мақсадида Навоий вилоят ИИБ масъуллари томонидан хизмат текшируви ўтказилган ҳамда тегишли интизомий чора қўлланган.
Изоҳ (0)