Toshkent viloyatining Yangiyo‘l shahrida 26 million so‘mga teng bo‘lgan qalbaki kupyurani muomalaga kiritmoqchi bo‘lgan guruh ushlandi.
Viloyat IIBB matbuot xizmati xabariga ko‘ra, ular 21-oktabr kuni Yangiyo‘l shahar ichki ishlar bo‘limi xodimlari tomonidan o‘tkazilgan tezkor tadbir davomida daliliy ashyolar bilan ushlandi.
Aniqlanishicha, bundan bir necha kun oldin Chirchiq shahrida yashovchi 31 yoshli fuqaro (A.U) 37 yoshli ayoli (K.K) bilan birga uch nafar tanishi (bir nafar ayol va ikki erkak)ni jalb qilgan holda bir guruh bo‘lib, Bo‘stonliq tumanida joylashgan dala hovlilarning birini ijaraga olgan va u yerda 100 va 200 ming so‘mlik valyutani qalbaki usulda tayyorlagan.
Oradan biroz vaqt o‘tib, ushbu kupyuralarni muomalaga kiritish maqsadida Yangiyo‘l shahar markaziy bozoriga kelgan ushbu shaxslar (tadbirkorlar xabari asosida) ichki ishlar bo‘limi xodimlari tomonidan gumonlanuvchi tariqasida qo‘lga olingan.
Holat yuzasidan xolislar ishtirokida o‘tkazilgan tintuv jarayonida ulardan jami qiymati 26 million 200 ming so‘mga teng bo‘lgan 100 va 200 ming so‘mlik qalbaki kupyuralar va rangli printer daliliy ashyo sifatida olingan (qalbaki pullarga nisbatan ekspertiza tayinlangan).
Hozirda mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) 2-qismi “v” bandi bilan jinoyat ishi qo‘zg‘atilib, tergov harakatlari olib borilmoqda.
Izoh (0)