AQSH xorijga joylashtirgan yadro qurollarining barchasini o‘z hududiga qaytarib olib kelishi kerak, dedi Rossiyaning Vashingtondagi elchisi Anatoliy Antonov. Bu haqda “Kommersant” xabar bermoqda.
“Hozirgi keskinlik va yuqori xavflar davrida yadro davlatlari zimmasida vaziyat kuchayishining oldini olish mas’uliyati turibdi. Shu munosabat bilan yana bir bor Vashingtonni chet elga joylashtirgan yadro qurollarining barchasini milliy hududiga qaytarib olib kirishga, uni saqlash va unga xizmat ko‘rsatish uchun tashkil qilingan xorij infratuzilmasini yo‘q qilishga chaqiraman”, — dedi Antonov.
Shuningdek, u Vashingtonni NATOning “qo‘shma yadroviy missiyalar” doirasida yadroviy bo‘lmagan harbiy davlatlarni jalb qilgan holda bunday o‘q-dorilardan foydalanishni mashq qilish amaliyotini to‘xtatishga da’vat etdi va bu Yadro quroli tarqatmaslik to‘g‘risidagi shartnoma tamoyillariga zid ekanini ta’kidladi.
Rossiya elchisi shu tariqa Politico nashrining AQSH Yevropaga modernizatsiya qilingan B61-12 taktik yadro aviabombalarini joylashtirishni tezlashtirgani haqidagi maqolasiga munosabat bildirdi. Ular avval rejalashtirilganidek kelasi yil bahorida emas, balki shu yil dekabrida NATO bazalariga yetkazilishi ma’lum qilingan.
17—30-oktabr kunlari NATO harbiylari alyansning yadroviy kuchini sinovdan o‘tkazish bo‘yicha Steadfast Noon mashg‘ulotlarini o‘tkazmoqda. Mashqlarda 70 ga yaqin samolyot qatnashmoqda. 26-oktabr kuni Rossiya harbiylari ham o‘z mashg‘ulotlari davomida dushmanning yadro zarbasiga javoban yirik yadroviy zarba berish bo‘yicha o‘quv mashg‘ulotlarini o‘tkazdi. Unga Vladimir Putin rahbarlik qildi.
Mavzuga doir:
- AQSH eng kuchli yadroviy bombasi — B83 ni yo‘q qilmoqchi. U Xirosimaga tashlangan bombadan 100 baravar kuchliroq
- Pentagon yangi mudofaa strategiyasini taqdim etdi. Unda Rossiya “o‘tkir tahdid” deb ataldi
- Bayden Putinning Ukrainada yadro qurolidan foydalanmasligi haqida aytgan gaplariga shubha bildirdi
Izoh (0)