Pentagon matbuot kotibi Sabina Sing matbuot anjumanida AQSH Mudofaa vazirligi Ukrainaga yana 275 million dollarlik harbiy yordam taqdim etishini ma’lum qildi, deb yozadi “RBK”.
Yangi harbiy yordam HIMARS raketa tizimlari va 155 mm gaubitsalar uchun o‘q-dorilarni o‘z ichiga oladi. Ukraina prezidenti ofisi rahbari Andrey Yermak o‘zining Telegram-kanalida Kiyev “HIMARS va artilleriya, qurol-yarog‘ va jihozlar uchun bundan ham ko‘proq o‘q-dorilar” olishini yozdi va Vashingtonga minnatdorchilik bildirdi.
Bir kun oldin AP xabar qilganidek, paket yangi qurollarning katta hajmdagi yetkazib berilishini emas, asosan Ukrainadagi qurol tizimlari uchun o‘q-dorilarni to‘ldirishni o‘z ichiga oladi.
Agentlik hisob-kitoblariga ko‘ra, 24-fevralda jangovar harakatlar boshlanganidan beri Qo‘shma Shtatlar Ukrainaga qariyb 18 milliard dollarlik qurol va harbiy texnika yetkazib bergan.
NBC telekanaliga ko‘ra, kongressmenlar Kiyevga 50 milliard dollarlik harbiy yordam ajratish to‘g‘risidagi qonunni qabul qilmoqchi. Respublikachi senatorlardan birining aytishicha, bu mablag‘ “Ukrainaning kelasi yilda omon qolishiga ishonch hosil qilish” uchun yetarli.
Izoh (0)