АҚШ хорижга жойлаштирган ядро қуролларининг барчасини ўз ҳудудига қайтариб олиб келиши керак, деди Россиянинг Вашингтондаги элчиси Анатолий Антонов. Бу ҳақда «Коммерсантъ» хабар бермоқда.
«Ҳозирги кескинлик ва юқори хавфлар даврида ядро давлатлари зиммасида вазият кучайишининг олдини олиш масъулияти турибди. Шу муносабат билан яна бир бор Вашингтонни чет элга жойлаштирган ядро қуролларининг барчасини миллий ҳудудига қайтариб олиб киришга, уни сақлаш ва унга хизмат кўрсатиш учун ташкил қилинган хориж инфратузилмасини йўқ қилишга чақираман», — деди Антонов.
Шунингдек, у Вашингтонни НАТОнинг «қўшма ядровий миссиялар» доирасида ядровий бўлмаган ҳарбий давлатларни жалб қилган ҳолда бундай ўқ-дорилардан фойдаланишни машқ қилиш амалиётини тўхтатишга даъват этди ва бу Ядро қуроли тарқатмаслик тўғрисидаги шартнома тамойилларига зид эканини таъкидлади.
Россия элчиси шу тариқа Politico нашрининг АҚШ Европага модернизация қилинган B61-12 тактик ядро авиабомбаларини жойлаштиришни тезлаштиргани ҳақидаги мақоласига муносабат билдирди. Улар аввал режалаштирилганидек келаси йил баҳорида эмас, балки шу йил декабрида НАТО базаларига етказилиши маълум қилинган.
17—30 октябрь кунлари НАТО ҳарбийлари альянснинг ядровий кучини синовдан ўтказиш бўйича Steadfast Noon машғулотларини ўтказмоқда. Машқларда 70 га яқин самолёт қатнашмоқда. 26 октябрь куни Россия ҳарбийлари ҳам ўз машғулотлари давомида душманнинг ядро зарбасига жавобан йирик ядровий зарба бериш бўйича ўқув машғулотларини ўтказди. Унга Владимир Путин раҳбарлик қилди.
Мавзуга доир:
Изоҳ (0)