Filippinda “Nalgaye” tropik bo‘roni tufayli 72 kishi halok bo‘ldi, tabiiy ofat oqibatida mamlakat janubiy provinsiyalarida suv toshqinlari yuzaga kelgan. Bu haqda Ofat xavfini kamaytirish va boshqarish bo‘yicha milliy kengash xabar bermoqda.
Bundan tashqari, 33 kishi jarohat olgan, 14 kishi esa bedarak yo‘qolgan deb hisoblanmoqda.
Hukumat bo‘ron xavfi tufayli minglab kishilarni evakuatsiya qilgan, unga oldindan tayyorgarlik ko‘rilgan, biroq “yog‘in miqdori kutilganidan ko‘proq bo‘ldi”, dedi Bangsamoro muxtor tumani ichki ishlar vaziri Nagib Sinarimbo. Uning qo‘shimcha qilishicha, Datu-Odin shahrining o‘zida yer ko‘chkilari ostida 80 nafargacha odam qolib ketgan bo‘lishi mumkin, qutqaruv ishlari olib borilmoqda.
Tayvan markaziy ob-havo idorasi bo‘ron orol tomonga qarab yo‘nalishi haqida ogohlantirdi. Ba’zi sinoptiklar ma’lumotlariga ko‘ra, u Tayvandan sharqqa qarab ketadi, boshqa sinoptiklar esa bo‘ron ancha g‘arbroqqa, Tayvanga yaqin hududlarga borishini prognoz qilmoqda. Yanada aniqroq ma’lumotlar 29 yoki 30-oktabrda paydo bo‘lishi aytilmoqda.
Bir kun avval Filippin janubidagi suv toshqinlari va ko‘chkilar oqibatida kamida 31 kishi halok bo‘lgani haqida xabar berilgandi.
Izoh (0)