Checheniston rahbari Ramzan Qodirov Ukrainada “Qasos” maxsus harbiy operatsiyasi olib borilayotganini ma’lum qildi. Bu haqda u o‘z Telegram-kanalida yozdi.
“Maxsus harbiy operatsiya zonasidagi jangovar harakatlar tafsilotlari kimga qiziq bo‘lsa, ‘Qasos’ nomi ostidagi alohida maxsus operatsiya muvaffaqiyatlari haqida ma’lum qilmoqchiman”, — dedi u.
Checheniston rahbari so‘zlariga ko‘ra, 25—27-oktabr kunlari Nikolayev-Krivoy Rog yo‘nalishida ushbu operatsiya ishtirokchilari “o‘t ochib zarba beruvchi vositalar” orqali 657 nafar jangchini yo‘q qilib, yana 300 kishini yaralagan. Shuningdek, 40 ta maxsus harbiy texnika yo‘q qilingan.
Ukrainaning Soledar shahri yo‘nalishida “Axmat” otryadi jangchilari bir kunda to‘rtta tank, beshta jangovar piyodalar mashinasi, bitta zirhli mashina va to‘rtta pikapni yo‘q qilgan. “95 nafar iblis izdoshlari va ikkita mustahkamlangan pozitsiyalar minomyotlar yordamida yo‘q qilindi. Bu faqat dastlabki va juda qisqacha ma’lumotlar, xolos”, — deb yozdi Qodirov.
Uning aytishicha, endi Ukraina qurolli kuchlari “qarshi hujum kayfiyatida emas”, Rossiya qo‘shinlari esa “dushmanning yangi hududlarini qamrab olmoqda”.
Avvalroq Ramzan Qodirov Xerson viloyatidagi chechen bo‘linmalaridan birining 23 jangchisi halok bo‘lgani haqida xabar bergandi. Yana 58 kishi yaralangan, dedi Checheniston rahbari. Uning so‘zlariga ko‘ra, o‘sha jangda 70 nafar Ukraina askarlari ham halok bo‘lgan.
Izoh (0)