AQSH hukumati Eron tomonidan chet elga qurol yetkazib berilishi, shu jumladan, Rossiyaga Ukraina shaharlarini bombardimon qilishda foydalanish uchun dronlar taqdim etilishiga qarshi kurashish uchun barcha vositalarni ishga solmoqchi. Bu haqda Davlat departamenti vakili Ned Prays brifingda ma’lum qildi.
“Bizda shunday vositalar borki, ular sanksiyalar va boshqa iqtisodiy choralar chegarasidan chiqadi. Biz yakunda o‘z manfaatlarimizga javob beradigan narsani qilmoqchimiz”, — dedi Prays.
Uning so‘zlariga ko‘ra, Eronning yovuz niyatli harakatlariga qarshilik ko‘rsatish masalasida Vashington hech narsani e’tiborsiz qoldirmaydi va xavf oldini olish uchun bor imkoniyatni ishga soladi.
Prays qo‘shimcha qilishicha, AQSH bu qadamlar haqida oldindan e’lon qilmoqchi emas.
“AQSH Eronning uchuvchisiz uchar qurilmalar dasturi tug‘dirayotgan xavfga bor diqqatini qaratgan. Eron uchar qurilmalari allaqachon Suriya, Iroq va Yaqin Sharqda qo‘llanilgan va endi Ukrainada ham ishlatilmoqda”, — dedi u.
Eron dronlari
Rossiyaga kamikadze dronlarni Eron yetkazib berayotgani haqida AQSH va Yevropa mamlakatlari hukumatlari gapirgandi. Bu haqda Amerika OAVlari ham yozgandi. Xususan, The Washington Post manbalariga ko‘ra, Tehron Moskvaga “o‘nlab” Mohajer-6 va ko‘p sonli Shahed-136 uchuvchisiz uchar qurilmalarini taqdim etmoqchi bo‘lgan. 20-oktabr kuni Yevroittifoq Eronning dron ishlab chiqaruvchi Shahed kompaniyasiga qarshi sanksiyalar kiritdi.Rossiyaning BMTdagi missiyasi G‘arb mamlakatlari ma’lumotlarini dezinformatsiya kampaniyasi hamda Moskva va Tehronga bosim o‘tkazish uchun to‘qib chiqarilgan bahona deb atadi. Eronning BMTdagi doimiy vakili Amid Said Iravaniy ham dronlar yetkazib berilayotgani haqidagi ayblovlar asossiz ekanini aytgandi.
Izoh (0)