“Daryo” internet-nashri hamda Toshkent shahri hokimligi qoshidagi Jamoatchilik kengashi hamkorligida tashkil etilgan “Mahalla. Muammo. Mulohaza” loyihasining 4-soni mehmoni mustaqil jurnalist, publitsist, bloger Nozim Safari bo‘ldi. Ko‘rsatuvning bu galgi mavzusi — Toshkentning non oqizadigan ariqlari qani?
Nozim Safari ko‘rsatuv davomida yo‘llarda oqava suvlar to‘planib qolmasligi bo‘yicha bir nechta yechimlar bilan bo‘lishdi. Qayd etilishicha, g‘ovakli plitkalar yordamida suv bevosita yerning pastiga ketishi mumkin.
“Ko‘p xarajat ketmaydigan yoki yillarga cho‘ziladigan kompleks yechimlarni talab qilmaydigan boshqa yo‘llar ham bor. Masalan, oddiy yechimlardan biri: trotuar plitkalarini o‘zgartirish. Bizda katta-katta, temir betonli materialdan tayyorlangan plitkalar ishlatiladi. O‘shani kichkina, g‘ovakli ko‘rinishdagisiga almashtirilsa agar, hech bo‘lmaganda, o‘sha trotuar ustiga tushayotgan suv yer pastiga tushib ketadi va buni yer shimib oladi. Agar shunaqa plitkalardan foydalansak, Toshkentning ancha qismida biz suvlarni tabiiy ravishda yerning tag qismiga jo‘natib yuboramiz.
Yoki yana bir usuli bor, juda ham zamonaviy yechim: g‘ovakli asfaltdan foydalanish. U suvni yutib yuboradi o‘ziga. To‘g‘ri, unga yetib borishimizga hali ancha bor, lekin mana shu plitkalarni o‘zgartirish ham yaxshigina foyda olib keladi”, — deydi bloger.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)