“Toshkentda tabiiy yerlarni ko‘paytirish kerak”. Nozim Safari yo‘llarda suv to‘planib qolmasligi bo‘yicha o‘z takliflarini berdi

“Daryo” internet-nashri hamda Toshkent shahri hokimligi qoshidagi Jamoatchilik kengashi hamkorligida tashkil etilgan “Mahalla. Muammo. Mulohaza” loyihasining 4-soni mehmoni mustaqil jurnalist, publitsist, bloger Nozim Safari bo‘ldi. Ko‘rsatuvning bu galgi mavzusi — Toshkentning non oqizadigan ariqlari qani?

Ko‘rsatuv mehmonining ta’kidlashicha, faqatgina drenaj tizimining o‘zi yo‘llarda to‘planib qolayotgan suv muammosini hal qilib berolmaydi. Oqova suvlarni o‘ziga tortib, yer qariga singdirib yuboradigan tabiiy, tuproqli yerlar ham kerak.

Agar qaysidir shaharda suvni chiqarib yuborish bilan bog‘liq muammolar kuzatilayotgan bo‘lsa, bu, birinchi navbatda, shaharda yer kam qolayotganining alomati hisoblanadi. Chunki asfaltli, betonlashtirilgan, sun’iy qattiq qoplamali yo‘llar qurilayotgani suvni chiqarib, asosiy qismini yutib yuboradigan oddiy qum, tuproqli yerlar kam qolayotganidan dalolat. Mana shu asosiy urg‘u bo‘lishi kerak bizda. Drenaj tizimi deganda faqat kollektorda oqizib yuboriladigan suvlarni inobatga olamiz. Lekin katta suv toshqinlari kuzatilganda drenaj tizimlari yaxshi ishlaydigan hududlarda ham muammo yuzaga chiqib kelyapti, — deydi u.

Baribir muammolar ko‘p, ammo mana shunday fundamental, mohiyatan muhim bo‘lgan narsalardan boshlash kerak. Toshkentda yerni ko‘paytirish masalasini o‘ylab ko‘rsak yaxshi bo‘lardi. Hatto katta tashkilotlarning hovlisiga kirsangiz ham biror joyda tuproq ko‘rmaysiz, oddiy yer ko‘rmaysiz. Hammayoq betonlashtirilgan. Tuvakda gul o‘sib turar, ammo tabiiy yer yo‘q, — deydi jurnalist.