“Drenaj tizimi — ko‘rinmaydigan soha”. Nozim Safari kanalizatsiya ishlaridagi kam e’tibor beriladigan muammolarga to‘xtaldi

“Daryo” internet-nashri hamda Toshkent shahri hokimligi qoshidagi Jamoatchilik kengashi hamkorligida tashkil etilgan “Mahalla. Muammo. Mulohaza” loyihasining 4-soni mehmoni mustaqil jurnalist, publitsist, bloger Nozim Safari bo‘ldi. Ko‘rsatuvning bu galgi mavzusi — Toshkentning non oqizadigan ariqlari qani?

Nozim Safarining ko‘rsatuv davomida qayd etishicha, ko‘chalarda, yo‘l bo‘ylarida suvlarning yig‘ilib qolishi — katta muammo. Ammo bu holatga yetarlicha e’tibor berilmaydi.

Suvning qayerdadir yig‘ilib qolishi nafaqat odamga yoki avtoulovga, harakatga ta’sir qiladi, balki yo‘lning sifatini ham tushiradi. Bundan tashqari, trotuar plitkalari ham ishdan chiqadi.

Suv bir joyda yig‘ilib qolmasligi kerak, juda katta zarar. Bu holatga bizda kam e’tibor beriladi. Suv oqizish, drenaj tizimi — ko‘rinmaydigan soha. Chunki biz qayerlardadir kichik-kichik latoklarni ko‘ramiz-u, lekin asosiy kollektorlarni bilmaymiz, suv qayerdan kirib qayerdan chiqib ketishi bizga ma’lum emas.

So‘nggi paytlarda quruvchilarimiz ham qandaydir ibtidoiy umid bilan uylarni quryapti. Suvlarni chiqarib yuborish masalasiga kelganda shunchaki umid bilan “suv o‘zining yo‘lini topadi, qaysidir teshikdan chiqib ketadi” deb o‘ylashadi. Lekin unaqa emas, — deydi jurnalist.