Toshkent va Buxoro viloyatlarida iste’molga yaroqsiz 2,3 tonnadan ortiq go‘sht sotilishining oldi olindi

Toshkentning Zangiota va Buxoroning Jondor tumanlarida iste’molga yaroqsiz jami 2371 kilogramm go‘sht mahsuloti sotilishining oldi olindi.

Bosh prokuratura huzuridagi departamentning Zangiota tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda, fuqaro B.T. yashirin sex tashkil qilib, sanitariya qoidalariga zid ravishda turli xildagi go‘sht mahsulotlari tayyorlab sotish bilan shug‘ullanib kelayotganligi aniqlanib, tadbir yakunida iste’molchilarning hayoti va sog‘ligi xavfsizligi talablariga javob bermaydigan jami 1 271,5 kilogramm go‘sht mahsuloti ashyoviy dalil sifatida olingan.

Shu kabi, departamentning Jondor tuman bo‘limi tomonidan tegishli mutasaddi tashkilotlar xodimlari bilan o‘tkazilgan o‘rganish davomida, fuqaro F.F. “Jondor tuman EKO bozor” MCHJ hududida iste’molchilarning hayoti va sog‘ligi xavfsizligi talablariga javob bermaydigan 1 100 kilogramm go‘sht mahsulotini muomalaga kiritish maqsadida saqlab kelayotgani aniqlangan.

Mazkur holatlar yuzasidan Jinoyat kodeksning 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishlari qo‘zg‘atilib, tergov harakatlari o‘tkazilmoqda.

Mavzuga doir:

• Qashqadaryodan Toshkentga olib ketilayotgan 100 kilodan ortiq yaroqsiz go‘sht to‘xtatib qolindi
• Surxondaryodan Toshkentga olib ketilayotgan iste’molga yaroqsiz go‘sht ortilgan mashina to‘xtatib qolindi