МАГАТЭ (Атом энергияси бўйича халқаро агентлик) КХДРда ядро қуроли синовдан ўтказилиши эҳтимоли юзасидан хавотир билдирмоқда, деб ёзади Anadolu агентлиги.
МАГАТЭ раҳбари Рафаэл Grossи сўзларига кўра, КХДРда ядро қуроли иштирокидаги янги синовлар кучли хавотир уйғотади.
Агентлик КХДРда ҳисоб бўйича еттинчи ядро синовларига тайёргарлик кўрилаётганини аниқлаган, бироқ ядровий портлаш шу яқин орада содир бўлишидан дарак берувчи белгилар йўқ.
«Ҳамма нафасини ичига ютди. Илғорроқ синовлар шуни англатадики, улар тайёргарликни ва арсенал яратишни кучайтирган. Мана шунинг учун ҳам биз буни жуда диққат билан кузатяпмиз», — деди у.
МАГАТЭ бу содир бўлмаслигига умид қилмоқда, аммо афсуски, кузатувлар бунинг аксини кўрсатмоқда, деди агентлик раҳбари.
Япония, АҚШ ва Жанубий Корея КХДР ядро синовлари ўтказган тақдирда, унга «мисли кўрилмаган даражада жавоб» қайтаришга келишиб олганди.
2022 йил бошидан буён Пхеньян БМТ резолюциясини бузган ҳолда, турли масофали баллистик ракеталар иштирокида 20 дан ортиқ синовлар ўтказган.
Октябрь бошларида Шимолий Корея етакчиси Ким Чен Ин тактик ядро бўлинмаларининг ҳарбий тайёргарлигини кўздан кечиргани хабар берилди.
КХДР кетма-кет ядро синовларига тайёрланаётган бўлиши мумкинлиги юзасидан хавотирлар аввал ҳам билдирилган. Хусусан, июнь ўрталарида сунъий йўлдошдан олинган фотосуратлар Шимолий Корея ядро полигонидаги фаолликни кўрсатгани, у қўшимча ядро синовлари ўтказилишидан далолат бериши мумкинлиги айтилганди.
6 июнь куни МАГАТЭ бош котиби Рафаэл Grossи агентлик Пунгери полигонида фаолликни қайд этаётгани ва буни ядро қуроли синовларига эҳтимолий тайёргарлик белгиси деб ҳисоблашини айтганди. У агентлик маълумотларига кўра, Шимолий Кореянинг Ёнбендаги ядро объектида ишлар давом эттирилаётганини ҳам таъкидлади.
Изоҳ (0)