KXDR ketma-ket yadro sinovlariga tayyorlanayotgan bo‘lishi mumkin — ekspertlar

Shimoliy Koreyaning Pungeri yadro poligonidagi tunnellarni qayta tiklash ishlari KXDR ketma-ket yadro sinovlariga tayyorlanayotganidan darak berishi mumkin. Bunday fikrni ekspertlar bildirdi, deb yozadi “Interfaks”.

Yonhap agentligi xabariga ko‘ra, yaqinda sun’iy yo‘ldoshdan olingan fotosuratlar Shimoliy Koreya yadro poligonidagi faollikni ko‘rsatdi, u qo‘shimcha yadro sinovlari o‘tkazilishidan dalolat berishi mumkin.

Agentlik Vashingtonda joylashgan Beyond Parallel tahliliy markaziga tayanmoqda, u eng so‘nggi sun’iy yo‘ldosh tasvirlari yangi inshootlar qurilayotgani yoki eskilari modifikatsiya qilinayotganini ko‘rsatgani, bu esa obyektni bo‘lg‘usi sinovlar uchun qayta tiklash ishlari olib borilayotganidan dalolat berishi mumkinligini ma’lum qildi.

Xususan, 14-iyun, seshanba kuni olingan tasvirlar 4-tunnel yaqinidagi poligonda yangi qurilish harakatlarini ko‘rsatmoqda.

3-tunnelda taxminan to‘rt oy avval boshlangan ishlar esa ehtimol shu paytgacha yakunlangan va obyekt tez-tez tilga olinayotgan yettinchi yadro sinoviga tayyor.

Janubiy Koreya tashqi ishlar vaziri Pak Chjin 14-iyun kuni Shimoliy Koreya navbatdagi yadro sinoviga tayyorgarlikni yakunlagani haqida fikr bildirgan va endi “faqat siyosiy qaror yetishmayotgani”ni aytgandi.

Amerikaning Shimoliy Korey abo‘yicha maxsus vakili Son Kim ham KXDR tayyorgarlikni yakunladi va istalgan vaqtda sinovlarni o‘tkazishi mumkin, deb hisoblaydi.

6-iyun kuni MAGATE bosh kotibi Rafael Grossi agentlik poligonda faollikni qayd etayotgani va buni yadro quroli sinovlariga ehtimoliy tayyorgarlik belgisi deb hisoblashini aytgandi. U agentlik ma’lumotlariga ko‘ra, Shimoliy Koreyaning Yonbendagi yadro obyektida ishlar davom ettirilayotganini ham ta’kidladi.

May oyida BMT KXDR o‘zining Pungeri yadro poligonini qayta tiklayotgan bo‘lishi mumkinligini ma’lum qilgandi. Tashkilot tarqatgan press-relizga ko‘ra, yangi qurilish belgilari sun’iy yo‘ldoshdan olingan suratlarda 2018-yil — poligon yopilganidan buyon birinchi marta qayd etilgan.

Pungeri KXDRdagi eng yirik yadro poligoni hisoblanadi. G‘arb OAVlariga ko‘ra, undan birinchi marta 2006-yilda foydalanilgan. Shuningdek, 2009-yil mayida, 2013-yil fevralida, 2016-yil yanvari va sentabrida hamda 2017-yil sentabrida ham sinovlar o‘tkazilgan.

2018-yil mayida KXDR Pungeri sinov yadro poligonidagi tunnellarni demontaj qilgan edi. Poligonning uchta tunneli ushbu voqeani yoritish uchun KXDRga taklif qilingan qariyb 20 nafar jurnalist ko‘z o‘ngida portlatilgandi. Ayni vaqtda yadro quroli bo‘yicha xalqaro ekspertlar poligonga qo‘yilmagan. So‘nggi vaqtlarda G‘arb va Janubiy Koreya OAVlari Shimoliy Koreya yadroviy sinovlar o‘tkazishga tayyorlanayotgani va Pungeri yadro poligonining uchinchi tunneliga olib boradigan yo‘lni tezlikda qayta tiklash ustida ishlayotgani haqida bir necha bor ma’lum qilgandi. Taxminlarga ko‘ra, Pxenyan taktik raketalarga o‘rnatilishi mumkin bo‘lgan kichik yadro o‘qini sinab ko‘rishi mumkin. Agar eksperiment amalga oshsa, bu Pxenyan uchun to‘rt yarim yil ichidagi birinchi yadro sinovi bo‘ladi.

Avvalroq sun’iy yo‘ldoshdan olingan tasvirlar Eron koinotga raketalar uchirishga tayyorlanayotgani ehtimolini ko‘rsatayotgani xabar berilgan edi.