Qashqadaryo viloyatida nohaq ishdan bo‘shatilgan 24 nafar xodim ishiga tiklandi. Bu haqda “Daryo”ga Bandlik va mehnat munosabatlari vazirligi axborot xizmati rahbari Mavjuda Mirzayeva xabar berdi.
Ma’lum bo‘lishicha, vazirlik nohaq ishdan bo‘shatilganlar huquqini tiklash uchun voqea yuzasidan sudga murojaat qilgan.
Qashqadaryo viloyati Bandlik bosh boshqarmasi va vazirlikka murojaat qilgan “O‘zbekiston temir yo‘llari” AJ Qarshi harbiylashtirilgan qo‘riqlash boshqarmasining Qarshi otryadida ishlovchi 24 nafar xodim ishdan noqonuniy bo‘shatilganini aytib, ko‘mak so‘radi. Mazkur holat bo‘yicha sudga murojaat qilindi va sudda ishchilar huquqi Bandlik bosh boshqarmasining davlat mehnat inspeksiyasi tomonidan himoya qilindi, — deydi Mavjuda Mirzayeva.Qayd etilishicha, Fuqarolik ishlari bo‘yicha Qarshi tumanlararo sudi ishdan nohaq bo‘shatilgan 24 nafar xodim ishini ko‘rib chiqib, ularni ishiga qayta tiklash haqida qaror chiqargan.
Nohaq ishdan bo‘shatilgan paytimizda bizga ko‘mak bergan va huquqlarimizni himoya qilgan, ishga tiklanishimizga yordamlashgan mas’ullarga, vazirlikka rahmat, — deydi ishga qayta tiklangan xodimlar.
Izoh (0)